Анаабыр улууһа бэйэ исписэлиистэрин бэлэмниир сыалтан тус хайысхалаах кылаастары арыйан үлэлэтэр

Уустук бырагыраамаҕа судургутук быһаарсан 6 кылаас үөрэнээччилэрэ бэйэлэрэ айбыт оонньууларын чочуйаллар.  Маныаха улуустааҕы гимназия инженернэй кылааһыгар бары усулуобуйа олохтонон, оҕолор кыра кылаастан техническэй хайысханы баһылыыллар.

Виолетта Васильева, Анаабырдааҕы улуус гимназиятын 6 кылааһын үөрэнээччитэ: «Инженернай кылааспытыгар элбэх көмпүүтэрдэр бааллар. Саамай кыраһыабай кылаас буолар. Ааспыт сылга “Лучший класс года” буолбуппут. Элбэх ситиһиилээхпит, грамоталардаахпыт».

Ситиһии төрдө - үөрэнэргэ, сайдарга сөптөөх усулуобуйаны олохтооһун. Маннык кыаҕы оҕолорго олохтоох бөдөҥ бырамыысыланнай тэрилтэ тэрийбит. "Анаабыр Алмаастара" хампаанньа улууһу кытта бииргэ үлэлэһиитин чэрчитинэн бу кылаас былырыын арыллыбыт. Онон олохтоох каадыры оскуолаттан саҕалаан бэлэмнээн таһаарыыга бастакы улахан хардыы оҥоһуллубут.

Надежда Спиридонова, Анаабырдааҕы улуус гимназиятын омук тылын учуутала, 6 кылаас салайааччыта: «Профилизация наадатын өйдөөн тураммыт, биһиги 5 кылаастан инженернай кылаас арыйбыппыт. Хас биирдии оҕо бэйэтигэр моноблоктаах, үчүгэй баҕайы аныгы интерактивнай дуоскалаахпыт, интернеппыт олох үчүгэй. Олимпиадаларга, араас куонкурустарга кыттабыт».

Итини сэргэ 3D принтер кэлэн оҕолор бэйэлэрэ араас моделлэри оҥорон таһаараллар. Инженернэй кылааска 16 оҕо баар. Оттон гимназияҕа уопсайа 126 оҕо үөрэнэр. Ыраах хоту сытар улуус киин сиртэн итэҕэһэ суох сайдыытыгар материальнай-техническай хааччыллыы улахан оруоллаах. Бу кылаас кыаҕын туһааннаах эрэ үөрэнээччилэр буолбакка бүтүн улуус туһанар.

Валентина Матвеева, Анаабырдааҕы улуус гимназиятын дириэктэрэ: «Наһаа туһалаах, Экран-панельбытын уруокка эрэ буолбакка, барытыгар туттабыт».

Кэнники сылларга техническэй хайысхалаах үөрэххэ киирии ахсаана биллэ үрдээбит. Онон улууска ыытыллар каадыры бэлэмнээһин бэлиитикэ көрдөрүүтэ тупсар. Бу үлэни салгыы сайыннарар сыаллаах гимназия инникитин "Анаабыр Алмаастарын" тус кылааһын тэрийэри былаанныыр.