Саха сирин үрдүнэн Төрөөбүт төрүт тыл уонна сурук-бичик күнүн бэлиэтээтилэр

Олох бары көстүүтэ тылынан саҕыллар, култуура күүһүнэн арыллар. Саха тылын кылаан чыпчаала - олоҥхо тула үгүс киһи тоҕуоруһа мустубут. Эдэр олоҥхоһут Назар Филиппов оллоонноон олорон "Дьырыбына Дьырылыатта Кыыс бухатыыр" айымньыны толорор.

Назар Филиппов, олоҥхоһут: «Бэйэм олоҥхону толорорбун олуһун сөбүлүүбүн. Төрүт култуурабытын илдьэ сылдьар дьоннору кытта алтыһарбын астынабын».

Бу кэмҥэ тыл үөрэхтээхтэрэ итиэннэ тылы тарҕатыыга сүҥкэн суолталаах көрдөрөр-иһитиннэрэр эйгэ бэрэстэбиитэллэрэ төгүрүк остуол тула олорон суруналыыстыка туругун  кэпсэттилэр. Манна сахалыы тылынан ааҕааччы ахсаана сыллата аччыырын ыйдылар.  

Феодосия Габышева, СӨ наука Академиятын төрөөбүт тылы чинчийэр, харыстыыр уонна сайыннарар киинин салайааччыта: «Тылы билээччи ахсаана аҕыйааһына. Сүрдээх элбэх уустуктар бааллар. Норуоту кытта кэпсэтиигэ хас биирдии киһи, тылбыт баар буоларын туһугар, тугу эмит гынар буоллаҕына биһиги төрөөбүт тылбыт баар буолуоҕа».

Тыл күнүн көрсө дьиҥ сахалыы эйгэ төрүттэнэн 3 сүдү күүс - тыл, култуура уонна сомоҕолоһуу тускуланна.

Төрүт тылы уруйдаан-айхаллаан оһуохай тылын мааныта этиллэр. Ыччат дьон тоҕуоруһа мустан саха төрүт үҥкүүтүн оройуттан тутар, төрүт тылбыт сайдар кэскилин түстүүр.

Наталья Мордовская, төрүт култуура учуутала: «Оһуохайдыыр буолбуттар наһаа үчүгэй. Мин көрдөхпө урукку курдук ис-сүрэхтэриттэн оһуохайдыы сылдьалларын көрөммүн астынным».

Тылы харыстааһын уонна сайыннарыы судаарыстабаннай бырагыраама чэрчитинэн ыытыллар. сыллата 100 мөлүйүөн солкуобай үбүлээһин көрүллэн, 50 тахса бырайыак үлэлиир. Тыл күнүн дьоро мунньаҕар этиллибитинэн быйылгыттан улуустар тылы сайыннарыы бырагыраамаларын ылыныахтара, итини сэргэ саха тылын оскуолаҕа үөрэтиини аччаппат кыаҕы биэрэр сөптөөх быһаарыы олоххо киирбит. 

Сергей Местников, СӨ Бырабыыталыстыба бэрэссэдээтэлин солбуйааччы: «Улуус таһымыгар биһиги үлэбитин күүһүрдүөхпүтүн наада. Тыл өттүгэр үлэни өссө күүһүрдүөххэ наада».

Ол курдук быйыл тылы сайыннарыыга бастыҥ үлэлээх улуустар уонна бибилэтиэкэлэр үбүлээһин ылыахтара. Итини сэргэ тыл сүбэтин састаабын төрдүттэн уларытыахтара. Манна тыл үөрэхтээхтэрин сэргэ, ситэриилээх былаас бэрэстэбиитэллэрэ киириэхтэрэ. Отутус төгүлүн  төрөөбүт тыл уонна сурук-бичик күнэ өрөспүүбүлүкэ бүттүүнүгэр үрдүк таһымҥа ааста. Тыл декадата салҕанар .