Саха сиригэр кыһыҥҥы суолларынан социальнай суолталаах таһаҕастары тиэйии бара турар

Хоту улуустарга оту тиэйии үгэнэ. Бүгүҥҥү күҥҥэ Эбээн-Бытантай, Абый улуустарыгар күүтүүлээх от тиийдэ. Ол курдук Эбээн Бытантайга 262 туонна от кэлиэхтээҕиттэн 42 туоннатын Амма улууһуттан тиксэрдилэр. Абый улууһугар Кэбэргэнэҕэ 19 туоннаттан тахса от тиэйиилээх 2 массыына Чурапчы улууһуттан кэллэ. Оттон ааспыт сайын халаан уутуттан улаханнык эмсэҕэлээбит Өймөкөөн улууһугар өссө күһүөрү отторун барытын тиксэрбиттэрэ. Билигин сүөһү эбии аһылыгын, чуолаан уотурба кэлэрин күүтэллэр. 

Инна Яковлева, Өймөкөөн улууһун тыа хаһаайыстыбатыгар салалтатын салайааччыта: «Ынах-сүөһү ахсаанын аччапакка кыстыгы ортолоотубут. Ону таһынан эбии аһылык тиэнэ турабыт. Билигин бэйэбит бүдьүөппүтүттэн субсидия көрүллэн уопсайа 167 туонна комбикорм овес кэлиэхтээх».

Кыһыҥҥы суолунан олоҕу-дьаһаҕы хааччыйар таһаҕаһы массыынанан тиэйии-таһыы үлэтэ бу кыһын болдьохтон хаалан  иһэр. Быйылгы дьылга кыһыҥҥы кэмҥэ  тэйиччи сытар нэһилиэктэргэ уонна хоту  улуустарга былаан быһыытынан уопсайа 600 тыһыынчаттан тахса тонна таһаҕаһы тиэрдиэхтээхтэр. Бу барыта кэриэтэ уматык,оттук.Билинни туругунан былаан сүүрбэттэн тахса бырыһыана туолла.

Никита Павлов, СӨ нэһилиэнньэ олоҕор-дьаһаҕар куттал суох буолуутун хааччыйыы миниистирин солбуйааччы: «Кыһыҥҥы суолунан хоту уонна Арктика улуустарыгар таһаҕас тиэйиитэ уустугурда».

“Сахаэнерго” тэрилтэ уотунан, оттугунан 17 хоту улууһу хааччыйан көрөн-истэн олорор. Бүгүҥҥү туругунан энергетика уонна итиинэн хааччыйар эбийиэктэргэ наадалаах оттук уонна таас чох тиэйиитин үгэнэ. Барыта 58 тыһыынча туонна оттугу илдьэр сорук турар.

Дмитрий Фёдоров, "Сахаэнерго" тэрилтэ генеральнай дириэктэрин солбуйааччы: «36 тыһ. туонна дизельнай топливо, 22 тыһ. туонна таас чох. Билиҥҥи туругунан 35% былаан оҥоһулунна».

Быйылгы дьылга кыһыҥҥы суолунан таһаҕаһы тиэрдиигэ уустук күн-дьыл уонна үп-харчы тардыллыыта мэһэйи үөскэттэ. Арктикатааҕы атыы-эргиэн хампаанньатын нөҥүө нэһилиэнньэҕэ анаммыт социальнай суолталаах таһаҕас, чуолаан ас-үөл тиэйиитэ бытаарда. Уопсайа кыһыҥҥы суолунан былаан быһыытынан 5 тыһыынча туонна бородуукта, бурдук тиксэриэхтээхтэр. 

Алексей Шестаков, Арктикатааҕы атыы-эргиэн хампаанньа атыылаһыыга уонна эргиэҥҥэ салалтатын салайааччы: «Билиҥҥи туругунан 60 туонна тиийэн турар, сорох табаарбыт ылыллан саҥа айаннаан иһэлллэр. Оҕуруот аһа 30-ча туонна үс улууска тиийэн турар, билигин икки массыына тиэнээри тураллар».

Кыһыҥҥы суолларынан хаалбыт былдьаһыктаах олунньу, кулун тутар ыйдарга чуолаан муус устар ыйга диэри былааннаммыт таһаҕас барыта тиксэриллиэн наада.