Ыһыы кэмэ саҕаланан, сиэмэ бэрэбиэркэтэ маҕаһыыннарга ыытыллар

Россельхознадзор Амур уобалаһынааҕы уонна Саха сиринээҕи салалтатын судаарыстыбаннай иниспиэктэрдэрэ сиэмэни атыылыыр маҕаһыыннары, киоскалары, ырыынактары бэрэбиэркэлииллэр. Рассада олордуутун сезона саҕаланан бу маннык пакеттаах сиэмэлэри хонтуруоллааһын тэриллэр. Куорат сиэмэни уонна дача табаардарын атыылыыр бөдөҥ маҕаһыыныгар реестрга киирбит үүннэйи сиэмэлэрин көрөллөр.

Сергей Свинобоев, Россельхознадзор Амур уобалаһынааҕы уонна Саха сиринэҕи салалтатын судаарыстыбаннай иниспиэктэрэ: “Дьоҥҥо-сэргэҕэ санатан этиэхпитин баҕарабыт, хас биирдии хаалаах сиэмэ анал докумуоннаах уонна сокуоҥҥа эппиэттиир буолуохтаах. Ол курдук кэнники сылларга слекционердар элбэх саҥа суорду таһаараллар. Ол суордар анал тиһиликкэ киирбит буолуохтаахтар. Реестрга киирбэтэх сиэмэлэр атыыга тахсыылара бобуулаах”. 

Өскөтүн саҥа суорт судаарыстыбыннай тиһиликкэ киирбэтэх буоллаҕына, ол аата кини тустаах чинчийиини ааспатах итиэннэ ыарыыга, күн-дьыл усулуобуйатыгар эмиэ табыгаһа суох буолуон сөп. Ол эбэтэр бу үүннээйи суорда хаҕыгар суруллубут кэтэһиилэргэ эппиэттээбэт уонна мэктиэлээх үүнүүнү киһи ылымыан сөп.    

Александр Ню Ши Чан, Россельхознадзор Амур уобалаһыгар уонна Саха сиригэр салалтатын судаарыстыбаннай иниспиэктэрэ: “Маҕаһыыннарга кэтээн көрүү ыытыллар. Реестрга киирбэтэх сиэмэни атыылыыллара билиннэҕинэ, урбаанньыкка сэрэтии бэриллэр уонна атыыттан уһуллар”. 

Сиэмэлэри оҥорон таһаарааччы олордуллар култуура туһунан толору иһитиннэриини суруйуохтаах. Ону тэҥэ химическэй, биитэр биологическэй  эбииликтээх буоллаҕына ол эмиэ суруллуохтаах.  Билигин сиэмэ талыыта, атыылаһыыта киин болҕомтоҕо сылдьар. Маннык туһааннаах маҕаһыыннарга киһи кэлиитэ элбиир. Дьон сүрүннээн өрүү биир оҥорон таһаарааччы сиэмэтин атыылаһар. 

Николай До, Уус Алдан улууһун олохтооҕо: “Оҕурсу, помидор, моркуоп олордобут. Сыл аайы биир сиэмэни олордобут”.  

Сиэмэни талыы эмиэ туспа ымпыктардаах, хаачыстыбалаах эрэ сиэмэ үчүгэйдик силигилээн тахсар. Уопуттаах оҕуруоччуттар сиэмэ түргэнник үүнэригэр көҕүлүүр араас ньымалары туһаналлар уонна бэрэбиэркэлэммит сиртэн атыылаһаллар.

Любовь Васильева, маҕаһыын атыыһыта: “Ордук биллэр суортары дьон хамаҕатык ылар. Буоларын курдук саастаах дьон сылдьар итиэннэ эдэр дьон оҕуруокка баран эрэр эбиттэр диэн бэлиэтии көрөбүн”. 

Хас биирдии сибэкки сиэмэтэ араастаһар, ампуланан, көннөрү даҕаны, сыаната көрүҥүттэн тутулуктаах, оҕуруот аһыгар сыана эмиэ суордуттан араастаһар.