Номнуо 200-чэкэ ыты туттулар

Вячеслав Охотин ыты тутааччынан үлэлиир. Сулууспалара куорат уокуруктарын кытта дуогабардаһан күннэтэ бэйдиэ сылдьар ыттары тутуунан дьарыктанар.

 Вячеслав Охотин, бэйдиэ ыттары тутааччы: «Күҥҥэ 1-3 сайаапка киирэр. Саамай элбээбитэ 5 буолуон сөп». 

Холобур,  бу ыты музыка үрдүкү оскуолатын оройуонугар туттулар. Оскуола сайаапка түһэрэн хаһаайына суох сылдьар ыты тутан ылан хаайбыт. Ону Очиченко уулуссаҕа баар пууҥҥа илдьээри ыллылар.

Айсен Васильев, музыка үрдүкү оскуолатын исписэлииһэ: «Ыт судургутук туттарбыта. Иһиирбиппэр кэлбитин тутан ылан гаражка хаайбытым. Оскуолаҕа киириигэ анал ыты тутар тэриллээхпит. Онно эмиэ киирээччилэр».

Сайсары уокурук салалтата олохтоохтортон киирбит сайаапкаларынан күннэтэ үлэлиир. Сыл саҕаланыаҕыттан оройуоннарыгар номнуо сүүрбэттэн тахса  бэйдиэ сылдьар ыты туппуттар.

Аиза Копылова, Сайсары уокуругун тупсарыы үлэтигэр сүрүннүүр исписэлииһэ: «Бастатан туран анал сыһыарыыбытыгар сайаапка киирэр. Иһитиннэриини тута дуогабардаах тэрилтэбитигэр биллэрэбит. Бэтэринэнээринэй салалтаны кытта хас оптуорунньук аайы кэрийэн көрүүнү ыытабыт. Олохтоохтору кытта ыты хайдах сөпкө тутуу туһунан кэпсэтэбит, ыйынньыктары туттарабыт». 

 Күннэтэ куорат дьаһалтатыгар тустаах ыстаап күннэтэ үлэлиир.

Александр Скрябин, Дьокуускай куорат территориялары сайынарыыга департаменын салайаччы: «Хас киэһэ ахсын 5 чааска бэйдиэ ыттары тутууга мунньах буолар. Уопсайа 5 биригээдэ үлэлиир. Бүгүҥҥү күҥҥэ 178 төбөнү туттулар. Ааспыт сылга 2 133 төбө этэ». 

Сүрүннээн элбэх ыттаах сирдэринэн  Птицефабрика, ГРЭС, Сайсары, Строительнай уокуруктар буолаллар.

«Мантан саас бэйдиэ сылдьар ыттары тутуу тэрээһинин күүһүрдүөхтэрэ. Ону тэҥэ холбоһуктаах рейдэлэри тиһигин быспакка ыытыахтара. Өскөтүн олорор сиргитигэр элбэх ыт сылдьарын көрдөххүтүнэ уокурук салалтатыгар эбэтэр биир кэлим диспетчерскэй сулууспаҕа сайаапка түһэрэргит ирдэнэр», - Татьяна Николаева, корреспондент