Саха сиригэр социальнай бырагырааманан гаас ситимин тардыы салҕанар

Сылаас дьиэ иһигэр, саҥа оһоххо чааньык оргуйар. Ыал ийэтэ Ньургуйаана Охлопкова сылаас чээйдээх ыалдьыттарын үөрэ көрсөр. Былырыын күһүн элбэх оҕолоох Охлопковтар дьиэ кэргэн күөх төлөҥҥө холбоммуттара.

Кинилэр социальнай гаастааһын бырагыраама чэрчитинэн күөх төлөҥҥө холбоммут онус тыһыынча дьиэ хаһаайыттара буолаллар. Ил Дархан Айсен Николаев эдэр ыалларга ыалдьыттаабыта, эҕэрдэлээн туран, сэмэй бэлэҕин туттарбыта. Кырдьык да, эдэр, элбэх оҕолоох ыалга гаас киирэрэ олус табыгастаах, бу кыһын томмокко кыстаатыбыт, дьиэбит сылаас уонна ичигэс диэн ыал ийэтэ үөрэ кэпсиир.

Ньургуйаана Охлопкова, ыал ийэтэ: «Дьибит сылаас, абыранныбыт. Нэһилиэнньэҕэ улахан көмө буолар, ордук элбэх оҕолоохторго».

Охлопковтар дьиэ кэргэн үс оҕолоохтор, кырачаан кыыстара 2 саастаах. Кинилэр былырыын Чокурдаахтан көһөн кэлбиттэрэ. Хатаска саҥа, улахан дьиэ туттан,  күөх төлөнү киллэттэрэргэ, сайаапка биэрбиттэр. Уһаабакка, кэнээбэккэ, икки ыйынан үлэһиттэр кэлэн гааска холбообуттар. Охлопковтар дьиэ кэргэн былааннара киэн, бу сайын дьиэлэрин өссө тупсаран, кэҥэтэр былааннаахтар.

Ньургуйаана Охлопкова, ыал ийэтэ: «Дьиэбитин кыра-кыралаан тупсаран иһэбит».

Саха сиригэр социальнай гаастааһын бырагыраама чэрчитинэн элбэх үлэ ыытыллынна.  Бырагыраама саҕаланыаҕыттан күөх төлөҥҥө 10-тан тахса тыһыынча дьиэ холбонно. Үрдүк көрдөрүү 13 улууска уонна Дьокуускай куоракка бэлиэтэнэр. 

Эдуард Унаров, "Сахатранснефтегаз" тэрилтэ сүрүн инжиниэрэ: «2025 сыллаахха 18,5 мөл. көрүллүбүтэ федеральнай бүдьүөттэн субсидияҕа. Субсидияҕа кыттарга сэрии, байыаннай дьайыы бэтэрээнэ, элбэх оҕолоох ыал буолуохха наада».

Өрөспүүбүлүкэҕэ социальнай гаастааһын бырагыраамата үлэтин салҕыыр. Быйыл 2026 сылга социальнай гаастааһын бырагырааматынан 1,5 тыһыынча дьиэни күөх төлөҥҥө холбуур былаан турар.

Валерий Слепцов, "Сахатранснефтегаз" тэрилтэ техническэй холбооһун сулууспатын салайааччытын солбуйааччы: «Быйыл бастатан туран соҕуруу өттүбүт гаастаныахтаах. Ол курдук бырагыраамабыт салҕанан бара турар».

Тус тэрилтэ Өрөспүүбүлүкэҕэ күөх төлөн ситимин тардарга нэһилиэктэр ахсааннарын хаҥатарга дьулуһар. 2030 сылга диэри дьиэлэр күөх төлөн ситимигэр 28 нэһилиэнньэлээх пууннарга холбонуохтаах диэн сорук турар.