Рассада олордуутун түбүгэ үүннэ

Александра Ермолаева Хотугулуу-илиҥҥи федеральнай университет ботаническай саадыгар үлэлээбитэ 10-тан тахса сыл буолла. Билигин сиэмэ атыылаһыллан, буору бэлэмниир түбүккэ сылдьаллар. Сыллата саадка 50 тыһыынча кэриҥэ рассаданы олордоллор. Онтон улахан аҥара сибэкки, онтон хаалбыта оҕуруот аһын рассадата буолар. Сибэкки уонунан эгэлгэ көрүҥүн, оҕуруот аһын арааһын сыллата көхтөөхтүк ыһаллар.

Александра Ермолаева, ХИФУ ботаническай саадын декоративнай салаатын салайааччы: «Үүнэйии олордуутугар сүрүнэ буор буолар. Буору күһүн эрдэ бэлэмнээн кэбиһиэххэ сөп. Иһити эрдэттэн эмиэ бэлэмнээн, сууйан-тараан».

Тохсунньу ыйга манна эустома сибэкки рассадатын олорпуттара. Бу олунньуга биэрэс, баклажан, ый бүтүүтэ петуния сибэккини ыһар табыгастаах. Хас биирдии үүнээйигэ болҕомтолоох сыһыан, кыһамньы ирдэнэр. Оҕуруот аһыгар, сибэккигэ кэлин ситтэхтэринэ тус-тустуһунан уу кутуута, уоҕурдууну туһаныы туттуллар. Сиэмэни талыы эмиэ туспа ымпыктардаах, хаачыстыбалаах эрэ сиэмэ учугэйдик силигилээн тахсар. Уопуттаах оҕуруоччуттар сиэмэ түргэнник үүнэригэр көҕүлүүр араас ньымалары туһаналлар уонна бэрэбиэркэлэммит сиртэн атыылаһаллар.

Александра Ермолаева, ХИФУ ботаническай саадын декоративнай салаатын салайааччы: «Сиэмэни атыылаһарга хайаан да болдьоҕу көрүөххэ наада».

Ботаническай саадка уонтан тахса үлэһит үүнээйи олордуутугар эппиэттээх. Бу дьоҕус хоско дьиэҕэ үүнэр сибэккилэри бүөбэйдиллэр. Ол курдук хос сибэккилэрин кыстатан таһааран, элбэтэн көҕөрдүү кэмигэр туһаналлар. Прасковья Софронова саадка үлэлээбитэ сүүрбэттэн тахса сыл буолла. Кини күөх үүнээйилэри ыарыыттан уонна кэрбээччи үөнтэн-көйүүртэн харыстыыр.

Прасковья Софронова, ХИФУ ботаническай саадын үүнээйини харыстыырга сүрүннүүр инженерэ: «Үүнээйигэ кыһын дьиэ иһигэр паутиннай клещ баар буолар. Салгыммыт наһаа кураанах. Онно үүнээйилэр иммунитеттарын үрдэтэн биэриэххэ наада ».

Оҕуруот олордуута биллэн турар күүһү-уоҕу, сыраны, бүөбэйдээһини эрэйэр. Ону тэҥэ, үп-харчы эмиэ аҕыйаҕа суох барар. Аҥардас сиэмэ, буор, уоҕурдуу, битэмиин, тэрил, иһит-хомуос, фитолампа ыларга ботуччу суумма наада. Ол эрээри бэйэн илиин сылааһынан үүннэрбит оҕуруот аһа, дьэрэкээн сибэкки биллэн турар дуоһуйууну, үөрүүнү, туһаны аҕалар.