"Оскуола паартатыттан - үйэлэргэ өлбөөдүйбэт албаан аат" саҥа кинигэ сүрэхтэннэ

Пантелеймон Иннокентьевич Кочнев аатын сүгэр Тулагы орто оскуолатын 11 кылааһын үөрэнээччитэ Артем Ларионов кинигэ суруйда. Үөрүүлээх быһыыга-майгыга саҥа буруолуу сылдьар кинигэни сүрэхтээһин “Патриот” кииҥҥэ ыытыллынна. Бу күн бөрүөнү эрдэ илиитигэр ылбыт уолларын уруйдуу-айхаллыы ыраахтан чугастан дьоно, аймахатара, оскуола кэллэктиибэ кэллэ.

Степан Ларионов, Артём Ларионов эһэтэ: «Артем бэйэтэ оҕо эрдэҕиттэн активист, общественник. Үрдүккэ талаһара оҕо эрдэҕиттэн биллэр этэ».

"Оскуола паартатыттан - үйэлэргэ өлбөөдүйбэт албаан аат" диэн ааттаах кинигэтин оскуола үөрэнээччитэ 2 сыл архыыпка хасыһан, урукку дааннайдары булан, оскуола историятын, Аҕа дойду сэриитин кэминээҕи сыллары арылыччы суруйбут. Кинигэ 8 бастан турар диэн ааптар кэпсиир.

Артём Ларионов, кинигэ ааптара: «Тогда я подумал, что надо отобрать коллектив-комиссию и изучить все материалы, которые были мной найдены, а также моими руководителями в Национальном архиве РС(Я), а также в городе Санкт-Петербург».

100-тэн тахса страницалаах саҥа кинигэҕэ сэдэх хаартыскалар киирдилэр. Биир бас бэйэтин Ларионовтар  төрүччүлэригэр анаммыт, кинилэр буоллаҕына бары учууталлар эбит. Артем бу кинигэни биллэн туран бэйэтин уһуйааччыларыттан сүбэ-ама ылан таһаарбыт

Любовь Дьячковская, СӨ үтүөлээх учуутала, уһуйааччы: «Артем былырыын куораттан көһөн кэлбитэ уонна учууталлары ыҥыран волонтерскай хамсааһын тэрийиэххэ наада диэн эппитэ. Биһи сэттэ учуутал буолан киниэхэ көмөлөһөбүт, кини салайар, элбэх аахсыйаҕа кыттабыт».

Артем Ларионов чахчы оскуолатыгар волонтерскай ыстаап тэрийэн, анал байыаннай дьайыы сылдьар уолаттарбытыгар көмө-имэ буолар. Бу күн кинини кинигэ сүрэхтэниитинэн Арассыыйа Дьоруойа Игорь Юргин эҕэрдэлээтэ. Алгыс тылын эттэ. Онтон бу кинигэ эдэр көлүөнэҕэ хаалар сыаллаах оскуола түмэлигэр туттарыллан, история кэрэһитинэн буолуоҕа.

Наталья Кузьмина, оскуола түмэлин салайааччыта: «Кини оскуола историятын үчүгэй баҕайытык үөрэтэн барда. Уонна урукку дириэктэрдэри, учууталлары өрө тутара наһаа үчүгэй, хайҕаллаах дьыала. Историческай элбэх дааннай баар, хаартыскалар. Киэҥ ааҕааччыга интириэһинэй кинигэ буолуо диэн эрэнэбин».

Бу курдук Тулагы орто оскуолатын үөрэнээччитэ Артем Ларионов бэйэтин саастылаахтарыгар үтүө холобур буолан, салгыы өссө саҥа соруктары-сыаллары олоххо киллиэрэҕэ.