Үс сыл иһигэр "Якутия с тобой" волонтердара байыастарга 130-тан тахса туонна малы-салы тиксэрдилэр

Волонтердар ыстааптарыгар үлэ күөстүү оргуйар. Иистэнньэннэр анал байыаннай дьайыы кыттыылаахтарыгар анаан кыһыҥҥы таҥас тигэллэр. Кэлбит малы наардаан бэлэмнииллэр. Оттон сүрүннээн - Аҕа дойдуну көмүскээччилэрин күннэригэр анаан байыастарга бэлэх бэлэмнииллэр. Манна таҥас-сап таһынан, дойду минньигэс аһа киирэр.

Анна Ефимова, «Якутия с тобой» хамсааһын бэрэссэдээтэлэ: «Билигин байыастарбытыгар бэрэски буһардыбыт уонна собо саарылаатыбыт».

Ыстаап бу сыл саҕаланыаҕыттан туоннаттан тахса гуманитарнай көмө ыытта. Аныгыскы нэдиэлэҕэ эмиэ таһаҕас барара күүтүллэр. Олохтоохтортон, түмсүүлэртэн, улуустартан көмө тохтообокко киирэ турар. Холобура, бу Уус Алдан улууһун амарах санаалаах волонтердара байыастарга анаан дроннартан хаххалыыр сон тигэн аҕалбыттар.

Дроннартан хаххалыыр сон ыйааһына наһаа ыарахан буолбатах, 1,9 киилэ буолар, уһуна 3 миэтэрэ. Кини түргэнник хомуллар уонна элбэх миэстэни ылбат. Биир ый иһигэр иистэнньэннэр маннык 100 анал сону тигэн бэлэмнииллэр.

Светлана Ушницкая, Уус Алдан улууһун олохтооҕо: «Аан бастаан икки аҥаар миэтирэ гына тикпиппит. Ону уолаттар кылгас эбит, уһатан биэрин диэбиттэрэ. Ону үс миэтэрэҕэ уһатан биэрбиппит».

Бу курдук бары түмсэн, ким да туора турбакка анал байыаннай дьайыы кыттыылаахтарыгар бэйэлэрин көмөлөрүн ууран, сэмэй кылааттарын киллэрэллэр. "Боевые шелкопряды" волонтердара эмиэ үлэ үөһүгэр олороллор.

Мария Никифорова, волонтёр: «Индивидуальнай сиэккэ уонна тиэхиникэҕэ өрөбүт».

Волонтердар маскировачнай сиэккэ өрөллөрүн таһынан, сахалыы харысхаллары уонна сылгы сиэлиттэн араас оҥоһуктары оҥорон ыыталлар.

Тамара Попова, волонтёр: «Саҥа валяние тиэхиникэтинэн оҥороммун маннык стелькэлэри оҥордубут. Наһаа сылаастар уонна сүрүнэ ууну иҥэрбэттэр уонна эмтээх».

Маны сэргэ, Өрөспүүбүлүкэ анал байыаннай дьайыы кыттыылаахтарын тиэхиникэнэн, транспорынан хааччыйарын салгыыр. Бу сыл саҕаланыаҕыттан 11 техникэни ыыппыттара. Оттон бу нэдиэлэҕэ 3 тиэхникэ барара күүтүллэр.