Тулагы оскуолатыгар үүнээйини олордор саҥа сыах арылынна

Кыһыл лиэнтэ быһыллан, Тулагы агро оскуолатыгар историяҕа киирэр биир бэлиэ түгэн тосхойор. Сылы төгүрүччү үлэлиир теплицалаах сыах арыллынна. Үөрэх кыһатын үөрүүтүн үллэстэ ыраахтан-чугастан ыалдьыттар кэллиллэр.

Өр сыл ыра оҥостубут баҕа олоххо киирдэ. Теплицаҕа оҕурсууттан саҕалаан араас эриэккэс үүнээйилэргэ тиийэ олорудуллуоҕа. Манна өр сыл үтүө суобастаахтык үлэлии сылдьар маастар идэлээх, оҕолору агро хайысхаҕа үөрэтэр  Светлана Решетникова гидропоника ньыматынан  олордуу барарын кэпсиир.

Светлана Решетникова, производственнай үөрэтии маастара: «Бу анал аппараат, маны субстратка үүннэрэллэр. Шланг нөҥүө аһылыгын, минеральнай уоҕурдууну,  биэрэр. “Саюри” теплица ньыматын курдук».

Эмиэ Тулагы-Киллэм ытык сиригэр турар “Саюри» оскуолатын кытары бииргэ үлэлэһии сөбүлэҥин түһэрсэннэр, уопут атастаһыытыгар үлэ барар. Теплица эмиэ анал лаампа күүстээх уотунан үлэлиэҕэ. Билигин   гидоропоника эрэ буолбакка, ыһыы ньыматынан олордуу баран, бастакы үүнээйилэр силистэрин тардан, агрономнар иһитиннэрэллэринэн, бастакы хомууру кулун тутарга күүтэллэр.

«Саҥа эбийиэккэ үүнээйи эрэ буолбакка эт бородууксуйатын оҥорон таһаарар сыах баар буолуоҕа. Маныаха наадалаах оборуудабанньа барыта баар. Холобур, Тулагы оскуолата манна эт кэнсиэрбэтэ оҥорон таһаарар».

Убаһа, сылгы, ынах этиттэн халбаһы, кэнсиэрбэлэммит эт, барыанньа, тууһаммыт оҕурсу, помидор  онтон да атын бородууксуйа өссө элбэх ахсаанынан таҥыллан тахсыаҕа. Инникки бородууксуйа номнуо "Көмүс күһүн" Москва куоракка ыытыллар дьаарбаҥкаҕа кыайыыны ситиспитэ.

Михаил Петров, П.И.Кочнев аатынан Тулагы орто оскуолатын агро хайысхаҕа дириэктэри солбуйааччы: «Былырыын балык кэнсиэрбэтэ оҥоро сылдьыбыппыт. Ол курдук сордоҥу уонна сыалыһары оҥорбуппут. Маҕаһыын киэниттэн туох да уратыта суох».

Арыллыбыт сыах сүрүн сыала-соруга үөрэнээччилэри наукаҕа сыһыарыы, маныаха оҕолор тыа сирин усулуобуйатыгар үлэлээн-хамсаан улааталларыгар төһүү буолуоҕа. Онтон бу эбийиэк Дьокуускай куорат  дьаһалтатын көмөтүнэн үлэҕэ киирдэ.

Владимир Аржаков, Дьокуускай куорат баһылыгын солбуйааччы: “Дьокуускай баһылыга Евгений Григорьев сыллата  агро хайысхалаах оскуолаларга  1 мөлүйүөн олкуобайы материально-техническэй базаны сайыннарыыга диэн аныыр. Онон сокуолалар сайдаллар, ситиһиилэрэ үксүүр. Ол иһиһ Хатас уонна Тулагы оскуолалара өрөспүүбүлүкэҕэ солбуйса сылдьан наар инники күөҥҥэ сылдьаллар».

Тулагы оскуолатыгар биир ситиһии саҥа саҕахтары саҕыаҕа. Оҕолорго агро хайысхаҕа өссө суолталаах үлэ ыытыллан саҕаланна.