Степан Ильин хаһаайыстыбата судаарыстыбаттан өйөбүлү сөпкө туһаныыга үтүө холобур

Степан Ильин хаһаайыстыба тутан үлэлэппитэ быйыл бэһис сыла. Бииргэ төрөөбүттэр төрүт дьарыгы сөргүтүүгэ, уонна онтон дохуот ылыыга олохтоохтук ылсан күннэтэ түбүгүрэллэр. Кинилэр сүрүннээн эккэ анаан хороҕор муостааҕы туталлар. Быйыл 70-ча төбөнү кыстатан тураллар. Итини сэргэ инникитин кэҥиир соруктаах 7 ыанар ынаҕы бу күһүн ылбыттар.

Степан Ильин, хаһаайыстыба салайааччыта: "Үүтүнэн эмиэ дьарыктаныахпын баҕаран быйыл сэттэ ынахтаныахтаахпын. Уопсайынан 25 төбөҕө диэри ынаҕым ахсаанын тириэрдэн, эт уонна үүт хайысхаларынан дьарыктаныам. Үүппүн соҕотуопкалыыр тэрилтэҕэ туттарыахпын сөп эбэтэр бэйэм дьаһанан атыыга таһаарыахпын наада". 

Оттон саҥа саҕалыылларыгар "Агростартап" диэн бырайыак дьоһуннаах үктэл буолбут. Онон бу киэҥ-куоҥ хотону туттан, Өктөм нэһилиэгин кытыытыгар дьоһуннаахтык дьаһанан олороллор. Оттуур ходуһалара суох буолан, отторун бүтүннүү атыылаһан ылаллар. Экономист идэлээх Степан Иевич барытын ааҕан суоттаан, салгыы сайдар соруктаах.  

Степан Ильин, хаһаайыстыба салайааччыта: "Экономикатын ааҕан бараммын киһи бэйэтэ оттуур сирдээ-уоттаах буоллаҕына ти оҥорон кууһунан ылааччыларга атыылаан олоруон сөп, оттон биһиги курдук оту атыылаһан ылааччылар хайаан да сыахтаах буолуохтаахпыт, хайаан да бэйэбит оҥорон таһаарыахтаахпыт, хайаан да бэйэбит дьоҥҥо атыылыахтаахпыт оччоҕо эрэ харчы оҥостор эбиппит". 

Оннук диэн соруктанан Степан Ильин Хаҥалас улууһун уонна Өктөм нэһилиэгин граннарыгар кыттан, кыайан эт аһы оҥорор сыах туттубут. Бу муус устартан бастакы холонон көрүү оҥоһуктары астыаҕа. Бу борооскулар кыстаан тахсан баран, сайыҥҥы мэччирэҥҥэ төлөрүйэн, аны күһүн идэһэҕэ барыахтара. Онуоха кыс устата иҥэмтиэлээх аһылык, үчүгэй көрүү ирдэнэр. Үрдүттэн олорон илиилэрин араарбакка көрөр буолаллар, борооскулар төп-төгүрүктэр.

Никифор Ильин, хаһаайыстыба үлэһитэ: "Бу дойдуга отторо соччото суох эбит. Барыта буор,мас буолар. Киирбит от улахан аҥаара төптөрү ходуул буолан тахсар. Отурбанан эбэн-сабан этэҥҥэ кыстаан тураллар".

Билигин оруобуна кыстык оройо. Маныаха дьылы туоруурга Саха сиригэр ааспыт сайын барыта 427 тыһыынча туонна от бэлэмнэммитэ. Мантан билигин 65% ордон турар. Бу кээмэй күөххэ үктэниэххэ диэри тиийиэхтээх. 

"Тыа хаһаайыстыбатын министиэристибэтэ иһитиннэрэринэн, быйыл кыһын 148 тыһыынчаттан тахса сүөһү кыстаан турар, туруктара этэҥҥэ диэн сыаналыыллар. Билигин номнуо төрүөх саҕаланна, уопсайа барыта 200 тахса ньирэй төрөөтө", - Мария Дмитриева, корреспондент.

Төрүөх сүрүннээн тэрээһиннээх хаһаайыстыбаларга эрдэлээтэ. Быйыл Бүлүү бөлөххө бастакы ньирэйдэр төрөөтүлэр. Оту тиэйии үлэтэ салҕанар. Сүрүн болҕомто халааннаабыт улуустарга ууруллар.