Дьокуускайга саҥа оптуобустар сырыыга таҕыстылар

Дьокуускай куорат эбии 50 саҥа оптуобустанна. "Волгобас" диэн автобустар "Олохха-дьаһахха аналлаах инфрастрктура" национальнай бырайак чэрчитинэн ылыллан кэллилэр. Күлүүстэри туттарыы үөрүүлээх быһыыга-майгыга Хомсомуол болуоссатыгар ыытыллынна. Ил Дархан куорат общественнай транспорт сайыннарыыга бу төһүү күүс буоларын бэлиэтээтэ.

Айсен Николаев, СӨ Ил Дархан: "Бу оптуобустар үчүгэйдэрэ диэн, хоту сиргэ анаан-минээн оҥоһуллубут буоланнар, туох баар ирдэбилгэ эппиэтииллэр. Бары гааһынан үлэлииллэр. Биир бу курдук оптуобуска икки ПАЗ киһи батар". 

Элбэх дьону батарар оптуобустар номнуо кэлэр нэдиэлэттэн үлэлээн барыахтара.Чуолаан кыһалҕалаах машруттарга эбии киириэхтэрэ, итиэннэ эргэ оптуобустары солбуйуохтара.

Егор Алексеев, Дьокуускай куоракка суол уонна транспорт салалтатын салайааччы: "Бу оптуобустар эбии маршруттарга көмө буолаллар. Бу көлөлөр куораппытыгар баар кыһалҕаны быһаарыахтара диэн эрэнэбит".  

Талабек Турсуналиев оптуобус суоппарынан үлэлээбитэ уонтан тахса сыл буолла. Автобуска пассажирга уонна суоппарга даҕаны табыгастаахтык айанныырыгар бары усулуобуйа баар диэн этэр.

Талабек Турсуналиев, автобус суоппара: "Олу үчүгэй көлө. Курат олохтоохторугар олус табыгастаах буолуо. Сайыҥҥы өттүгэр кондиционердаа".  

Дьокуускайга оптуобус кыһалҕата бэрт сытыытык турарынан хас биирдии саҥа оптуобус кэлиитэ бү бэлиэ түгэн.

"Оптуобустарга бырайыаһы төлүүргэ аналлаах бу курдук табыгастаах аппарааттар тураллар", -  Татьяна Николаева, корреспондент.

Манна биллэн турар картанан, куар кодунан ону тэҥэ бытархай кумааҕы харчынан төлүөххэ сөп, харчы ордугун кытта ылар кыах баар.

Дьону таһар оптуобустары саҥардыы тэрээһинэ бу кэнники сылларга көхтөөхтүк ыытыллар. 2022 сылтан Дьокуускайга бу оптуобустары ааҕан туран 174 автобус кэллэ.

Семён Коркин, СӨ транспорт уонна суол хаһаайыстыбатын миниистирин солбуйааччы: "Куоракка уопсайа 250-270 оптуобус баар. Онуоха ааспыт сылга 100-чэкэ оптуобус кэлбитэ, быйыл 50-чэкэ кэллэ. Бу курдук тупсаҕай усулуорбуйалаах оптуобустары аҕалыы былааҥҥа өөс баар. Улуустары кытта үлэ барар. Ол курдук Нерюнгри, Алдан курдук улахан куораттары кытта уонна муниципальнай тэриллиилэри кытта бырагырааманы салгыыбыт". 

Киин куоракка 430 мөлүйүөн үп бигэргэтиллэн, кэлэр 3 сылга өссө эбии сүүстэн тахса оптуобус кэлэрэ күүтүллэр.