Арктикатааҕы култуура университетыгар үгүс саҥа хайысха арыллыа

4 куурус устудьуона   Дьокуускай куорат бэлиэ сирдэринэн виртуальнай тур оҥорбутун көрдөрөр. Устудьуоннар бу үлэни туһааннаах тэрилтэлэри кытта сөбүлэҥ быһыытынан оҥорон таһаараллар. Ол эбэтэр манна үөрэҕи таһынан, практикаҕа улахан болҕомто ууруллар итини сэргэ бизнес эйгэтигэр сысталлар.

Эдгар Иванов, Арктикатааҕы судаарыстыбаннай култуура уонна искусство, креативнай индустрия университетын информатика кафедратын устудьуона: «Хотугу Азия музыкальнай үнүстүрүмүөннэрин музейын сыыппараҕа киллэрдибит. Бастаан экспонаттары 3Д гына оҥорбуппут, онтон түмэл иһин устубуппут». 

Ол курдук култуура нэһилиэстибэтин сыыппараҕа тиһии диэн билим чинчийиитин тула үлэ барар.  Маныаха оҥоһуу өйү туһаныы үөрэхтээһин бырагырааматыгар киирэн үөрэтиллэр. Билии, сатабыл барыта бырайыагы олоххо киллэриигэ түмүллэр. Култуура уонна сыыппара быстыспат ситимэ олохтонор. 

Ольга Готовцева, Арктикатааҕы судаарыстыбаннай култуура уонна искусство, креативнай индустрия университетын информатика кафедратын доцена: «Ол курдук биһиги “Исследуйте мир” диэн сайтаахпыт. Бу манна биһиги турдарбытын кытта билсиэххэ сөп. Ким баҕпр киириэн сөп».   

Университекка күн бүгүн 1100 устудьуон үөрэнэр. 25 сыл эҥкилэ суох ситиһиилээхтик үлэлээн кэлбит үөрэх кыһата ый анараа өттүгэр университет аатын сүктэ. Бу, биллэн турар, сайдыыга өссө улахан кыаҕы биэрэр.

Зоя Стрекаловская, Арктикатааҕы судаарыстыбаннай култуура уонна искусство, креативнай индустрия университетын үөрэх салаатыгар проректора: «Биһиги университет буоламмыт элбэх хайысхалары арайыахтаахпыт, үөрэх хачыстыбатын тупсарыахтаахпыт. Ол курдук ахсынньы ыйга биһиги медиа коммуникация хайысхатыгар уонна прикладная информатика магистратуратыгар лицензия ыллыбыт. Инньэ гынан 2026-2027 сс. үөрэх дьылыгар бырагыраамалара оҥоһулла сылдьаллар».  

Маны сэргэ киинэ, тыйаатыр, музыка  хайысхаларын хабар үөрэх бырайыактара оҥоһулла сылдьаллар. Оттон бу театральная живопись диэн хайысха устудьуоннара. Сотору кэминэн Индияҕа туруохтаах "Лики олонхо" диэн испиктээкилгэ анаан көстүүмнэри тигэллэр.  

Айхаана Ыйдана,  Арктикатааҕы судаарыстыбаннай култуура уонна искусство, креативнай индустрия университетын устудьуона: «Билигин практика оҥоро сылдьабыт. Испиктээкилгэ анаан көстүүмнэри тигэ сылдьабыт». 

Айар куттаах ыччат түмсүбүт сиригэр күннэтэ саҥаттан саҥа  айыллар, сонун көстүүлэр үөскүүллэр. Айаана Мокунанова буолаары турар тэрээһин сценарийын чочуйар. 

Айаана Мокунанова, Арктикатааҕы судаарыстыбаннай култуура уонна искусство, креативнай индустрия университетын устудьуона: «Устудьуон күннээҕи олоҕо хайдах ааһар эбит буоллаҕына, үчүгэй баҕайытык ааһар, сарсыардаттан киэһээҥҥи диэри бары үлэлээхпит. Наар тугу эмэ саҥаны айабыт».  

Саҥа университет кэлэр үөрэх дьылыгар эбии 13 саҥа идэ бырагырааматыгар оҕолору сүүмэрдиэ.