Быйыл Олимпийскай оонньуулар үрүҥ көмүс призера Александр Иванов 75 сааһын туолла

Александр Иванов саха норуотун киэн туттар улуу спотсменнарыттан биирдэстэрэ. Дэгиттэр тустуук, кини аата аан дойду спордун историятыгар дьоһун миэстэни ылыан ылар. Александр Николаевич 75 сааһыгар анаммыт Александр Иванов - Великий Пехлеван диэн быыстапка үөрүүлээх аһыллыытыгар саха музейа бар дьонунан толору туолла. Биир бастакынан кинини доҕоро олимпийскай чемпион Павел Пинигин эҕэрдэлээтэ. Кини Ираҥҥа ыытыллыбыт турнирга Александр хайдах курдук чаҕылхайдык кыайыыны ситиһэн Великий Пехлеван диэн  ааты ылбытын ахтан ааста.

Павел Пинигин, 1976 с.Олимпийскай оонньуулар көҥүл тустууга чемпиона: «Үс күнү быһа иранецтары биир биир кыайталаан. Кинилэр хайдах тусталларын бэркэ билэҕит. Иранецтар бастыҥ киһилэрин ааттыыр аатынан иҥэрбиттэрэ».

Александр Иванов аатырбыт тренер Дмитрий Коркин иитиллээччитэ, Аан дойдутааҕы турнирдар хас да төгүллээх чемпиона, 1976 Монреальга ыытыллыбыт Олимпийскай оонньуулар үрүҥ көмүс призера, Саха сирин үтүөлээх тренерэ, норуоттар икки ардыларынааҕы кылаастаах 5 спорт маастарын иитэн таһаарбыта. 

Александр Иванов, 1976 с.Олимпийскай оонньуулар көҥүл тустууга үрүҥ көмүс призера: «Бэйэм талан ылбыт идэбэр ситиһиилээхпин. Саха киһитигэр бэйэм олохпун таба олорон эрэбин диэн. 75 саас диэн наһаа элбэх буолбатах буолуо дии саныыбын, өссө олохпут инники. Билиҥҥи үйэҕэ эдэр ыччаттар спортунан уонна физкультуранан күүскэ дьарыктаныахтарын наада. Үлэ буларга доруобай эрэ киһи үчүгэйдик булуон сөп».

Быыстапкаҕа Александр Иванов улахан спорка тус суолун историятын кытта сиһилии билсиэххэ сөп. Манна спортсмен үтүмэн элбэх наҕараадаларын, Олимпиадаҕа ылбыт үрүҥ көмүс мэтээлин, ураты сэдэх хаартыскалары, архыып докумуоннарын көрөр кыах баар. 54 сыл устата кини олоҕун аргыһа буолбут Варвара Афанасьевналыын 3 оҕону атаҕар туруоран, билигин уон сиэн, хос сиэн эбэлээх эһэлэрэ.

Варвара Иванова, Александр Иванов кэргэнэ: «Александр Николаевич бэйэтэ сүрдээх сымнаҕас, олоххо туох ыараханы көрсөр да кини хаһан да кини дьиэтигэр илдьэ кэлбэт идэлээх. Үөрбүтүнэн-көппүтүнэн киирэр».

Александр Николаевич билигин даҕаны ыччаты спорка угуйар, баай уопутун кытта үллэстэр, сүбэлиир-амалыыр, оҕолор күрэхтэһиилэрин төрүттээччи, көҥүл тустууга өрөспүүбүлүкэ сүүмэрдэммит хамаандатын сүбэһитэ.

Василий Гоголев, көҥүл тустууга спорт үтүөлээх маастара: «Биһиги саха норуота олимпийскай чөмпүйүөннэрбитин үтүөлээх маастарбытын дьон-сэргэ, эдэр ыччат билиэхтээх».

Александр Иванов спорка бэриниитэ, кини кыайыыга тардыһыыта, чаҕылхай ситиһиилэрэ, дьиэ кэргэнигэр сыһыана бу хас биирдиибитигэр холобур буолар.  Быыстапка олунньу 15 күнүгэр диэри үлэлиэҕэ.