2025 сыл түмүгүнэн Саха сиригэр 10 тыһ. тахса оҕо күн сирин көрбүт

45

Главное

Мэҥэ Хаҥалас улууһун Наахара нэһилиэгиттэн сылдьар Марина Назарова 3  хонуктааҕыта этэҥҥэ оҕолонон сүргэтэ көтөҕүллэ сылдьар. Аны номнуо балыыһаттан тахсарга бэлэмнэнэр. Ийэ саҥа төрөөбүт кырачаанын бэйэтин үүтүнэн аһатар. Икки миэстэлээх хоско ирдэбилгэ эппиэттир бары услуобуйа баар. Быраастар бэрт болҕомтолоохтук сыһыанаһаллара наһаа үчүгэй диэн эдэр ийэ санаатын үллэстэр.

Марина Назарова, Мэҥэ Хаҥалас улууһун олохтооҕо: «12 чыыһыла түүн төрөөбүтүм. Иккис оҕом, Перинатальнай сыантыр үчүгэй балыыһа эбит дии санаатым, бырааспыт Лариса Петровна үчүгэй баҕайы быраас эбит. Тотоойу минньигэс аһынан аһаталлар».

Дьокуускайдааҕы Перинатальнай Кииҥҥэ Саха сирин бары улуустарыттан сүрүннээн болдьох иннинэ төрүөхтээх, эрдэ эппэрээссийэлэммит ийэлэр киирэн оҕолоноллор. Билигин Кииҥҥэ алта уонтан тахса саҥа төрөөбүт дьахтар баар, послеродовой салаа уопсайа 85 миэстэлээх. Ааспыт сылга манна биэс аҥар тыһыынчаттан тахса оҕо төрөөбүтэ, бу сыл үүнүөҕүттэн номнуо 200-тэн тахса кырачан күн сирин көрдө. 

Лариса Аргунова, Дьокуускайдааҕы перинатальнай киин акушер-гинеколога: «Палааталарбыт бары “мать и дитя” диэннэр. Ийэ оҕолонно даҕаны оҕотун кытта тэҥҥэ палаатааҕа киирэр. Гинекологтар уонна неонатологтары тэҥҥэ үлэлээммит көмөлөһөбүт».

Хат дьахталлар ортолоругар бүгүҥҥү күҥҥэ үрдүк дабылыанньа уонна сахарнай диабет курдук ыарыы элбэхтик бэлиэтэнэр диэн быраастар бэлиэтииллэр. Маныаха кииҥҥэ тустаах патология салаатыгар ыарыылаахтары көрөн-истэн, эмтээн төрүүргэ бэлэмнииллэр. Оҕо туруга биллэн туран ийэтин доруобуйатыттан быһаччы тутулуктаах. Маныаха оҕо төрөөтүн кытта тустаах чинчийиини ааһан ыарыыны эрдэттэн сэрэтиигэ болҕомто уураллар.

Марианна Неустроева, Дьокуускайдааҕы перинатальнай кииҥҥэ оҕо бырааһа: «Оҕолор туруктара бары доруобайдар, саҥа төрөөбүт оҕолор ийэлэрин кытта тэҥҥэ сыталлар. Төрүөхтэриттэн тахсыахтарыгар дылы биир палаатаҕа сыталлар».

Саха сирэ нэһилиэнньэ эбиллиитинэн, оҕо төрөөһүнүн көрдөрүүтүнэн Арассыыйа регионнарыгар инники күөҥҥэ сылдьар. Демографическай балаһыанньаны тупсарыыга дьиэ кэргэҥҥэ көмө миэрэлэр ахсааннара сыллата эбиллэр, ол биллэн турар ыал оҕолонуутугар улахан төһүү буолар.

Читайте также