“Инникигэ хардыы” кэмпириэнсийэҕэ 1600 оҕо кытынна

Горнай улууһуттан кыттыыны ыла кэлэ сылдьар Айтал Жирков пластик матырыйаалы уулларар станогу бэйэтэ таҥан оҥорон таһаарбыт. 10 кылаас оҕото маны олоччу бэйэтэ толкуйдаан, билигин олоххо туһаныллар үлэлиир аппарааты "Инникигэ хардыы"  кэмпириэнсийэҕэ көрдөрө,экспертэр дьүүллэригэр туруорда.

Айтал Жирков, Өрөспүүбүлүкэтээҕи "Инникигэ хардыы" НПК кыттыылааҕа (Горнай улууһа): “ПВХ пластигынан оҥорбутум. Ититэр матарыйаала нехромовай боробулуоха. Туттарга түргэн уонна оҥорууга матырыйаалларын сыаната чэпчэки, дэбигис көстөр”.

Быйылгы эдэр чинчийээччилэри түмэр үбүлүөйдээх 30 төгүлүн ыытыллар "Инниккигэ хардыы" наука тэрээһинэ 1600-тан тахса кыттааччылаах. 13 секциянан хайдан 5 кылаастан саҕалаан 11 кылааска диэри үөрэнээччилэрэ үлэлэлэрин көмүскүүллэр. Тэрийээччилэр иһитиннэрэллэринэн, быйыл айти технологиялар, биотехнологиялар уонна беспилотнай авиация тус-туспа салаанан баар буолуллар.

Андрей Михайлов, Өрөспүүбүлүкэтээҕи "Инникигэ хардыы" НПК кыттыылааҕа (Чурапчы улууһа): “Каркаһын фанераны сыһыаран оҥорбутум. Контроллердарын, драйвердарын сакаастаан ылбытым. Манна барыта 10 тыһыынча солкуобай барбыта”.

Ыраах Сунтаар улууһуттан кэлэ сылдьар Венера Иванова буортута суох сууйар-тарыыр сурадаһыннары салайааччытын кытары оҥорон таһаарбыт. Олохтоох нэһилиэнньэ номнуо бу бородууксуйаны туттубут. Сууйара-соторо үчүгэйин дьон биһиирээбит. Таҥас сууйар бороһуок, бээтинэни ыытар, иһит сууйар сурадаһыннар уопсайа 10 тахса бородууксуйа араас көрүҥэ оҥоһуллар. 

Венера Иванова, Өрөспүүбүлүкэтээҕи "Инникигэ хардыы" НПК кыттыылааҕа (Сунтаар улууһа): “Кокос арыытыгар щелочь холбуубун, маннык ньыманан мыыла оҥорон таһаарабын. Саҥа төрөөбүт оҕолорго уонна аллергиялаах дьон туһаналларыгар аналлаах. Бу бырайыак биһиги оскуолабытыгар 2015 сылтан чинчийиллэн саҕалаабыта”.

Быйылгы кэмпириэнсийэ уратылаах буолла, 2026 сылтан саҕалаан дьүүллүүр сүбэҕэ, көҥүл экспертэр баар буоллулар диэн тэрийээччилэр иьитиннэрэллэр.

Александра Яковлева, Өрөспүүбүлүкэтээҕи "Инникигэ хардыы" НПК тэрийээччитэ: “Быйылгыттан общественнай экспертар диэннэр оҕолор үлэлэрин көрөллөр. Бырайыагы хайдах сайыннарыы туһунан кэпсэтии бара турар”.

"Инниккигэ хардыы", чахчы, оҕолорго үгүс ааны арыйар. Былырыын дойду таһымыгар 1247 Саха сирин эдэр чиничийээччилэрэ, оскуола оҕолоро Россия таһымын биир ньыгыл платформатыгар киирбиттэрэ.