Бу нэдиэлэҕэ халлаан сылыйыа

Быйыл кыһын уһун тымныылар тураллар. Ахсынньы ыйтан саҕалаан күн ахсын -45 кыраадыс уонна онтон намыһах температура олохсуйда. Бырааһынньыктааҕы уһун өрөбүллэргэ бары суһал сулууспалар үрдүк бэлэмнээх үлэлээтилэр, ордук эппиэтинэс, биллэн туран, балыыһаларга, суол-иис, энергетика, коммунальнай хаһаайыстыба үлэһиттэригэр сүктэрилиннэ.

Пётр Тастигин, Сайсары уокуругун салайааччы: "Барыта этэҥҥэ ааста. Улахан кээһэнии тахсыбата".

Тымныы  Сахабыт сирин сүрүн тутула, онон айылҕа ураты күүһүн кытта тэҥҥэ силбэһэн күннээҕи олох салҕанар. Тымныыны аахсыбакка төттөрүтүн тымныыттан күүс-уох, сэниэ эбинэр дьон кэккэтэ уруккуттан күн баччааҥҥа диэри аччаабат.

Маннык улахан тымныыларга сүүрэр дьон баара кими да улаханнык соһуппат буолан турар. Хас өрөбүл ахсын пааркаҕа мустан эдэрдиин кырдьаҕастыын биир санаанан салайтаран сүүрэннэр бэйэлэрин тургуталлар. Оттон сорох тымныы ойбоҥҥо сөтүөлүүр. Саха моржтара диэн ааттанар түмсүү кыттыылаахтара бэлэмнээх киһи этэ-сиинэ хайдах курдук тулуурдааҕын көрдөрөллөр. Оттон бу Өймөкөөҥҥө тымныы марафонун кыттыылааҕа Кореяттан сылдьар экстремал-турист эмиэ ойбоҥҥо киирэн бэйэтин кыаҕын холонно.

"Арчы" дьиэтин үлэһитэ, алгысчыт Петр Кычкин тымныы Сахабыт сирин харысхала, күүһэ диэн өйдөбүллээх.

Пётр Кычкин, "Арчы" дьиэтигэр фольклор исписэлииһэ, алгысчыт: "Тымныы биһиги харысхалбыт буолар. Онон махтаныах эрэ тустаахпыт. Хас биирдии киһи тымныыттан харыстанар усулуобуйатын бэйэтэ оҥостор".

Бу нэдиэлэҕэ тымныы арыый уҕарыйан сылыйыа диэн күнү-дьылы кэтээн көрөөччүлэр сылыктыыллар. Ол курдук Охотскай муораттан сис былыт хаары аҕалан салгын температурата -30 кыраадыска диэри үөһээ тахсара күүтүллэр.

Саргылаана Никитина, Дьокуускайдааҕы гидрометеорологическай сулууспа күнү-дьылы кэтээн көрөр салаатын салайааччы: "Арҕаа улуустарга нэдиэлэ ортото түүнүн -43- -48 кыраадыс, оттон күнүс -33 - - 38, сорох сирдэринэн -25 диэри сылыйыа. Киин улуустарга муҥутаан -28 диэри сылыйыа".

Онтон соҕуруулуу-илин улуустарга бэл -13- -18 эрэ кыраадыс тымныы буолуо диэн билгэлииллэр. Онон бу нэдиэлэ сылаас күннэри бэлэхтиэ.

"Тохсунньу ыйга сааһы уонна сайыны билгэлииллэр. Бу ыйы от ыйа батыһар, тымныйдаҕына сайын сөрүүн буолар. Оттон сылыйдаҕына сайына куйаас", - Татьяна Николаева, корреспондент.