Дьокуускайга тутулла турар социальнай эбийиэктэр тутууларын хаамыытын Ил Дархан көрдө
Ил Дархан Айсен Николаев үлэ хаамыытынан бастакынан Дьокуускайдааҕы ГРЭС тэрилтэтигэр сырытта. Кыһыҥҥы тымныы күннэргэ үлэ хайдах бара турарын билистэ. Маны сэргэ саҥа тутулла турар эбии станциялары көрдө. Тутуу үлэтэ былааннаммыт болдьоҕуттан хаалбакка бара турар, сыл бүтүүтэ үлэҕэ киирэрэ күүтүллэр.
Гаврил Алексеев, "Якутскэнерго" тэрилтэ генеральнай дириэктэрэ: "Быйыл биһиги ыстаансыйабыт үлэҕэ киириэҕэ. Ону таһынан “Тймаада ТЭЦ” саҥа тутуулара эһиил олоххо киириэхтэрэ. Быйылгы кыстык этэҥҥэ. Үлэ хаамыытын Ил Дархан Айсен Николаев бэйэтэ кэлэн көрөн барда".
Саха сирэ 2030 сылга диэри уот кыамтатын сайыннаран, энергетика күүһүн икки төгүл улаатыннарарга сорук турар. Маныаха, үлэ бу хайысхаҕа тэтимнээхтик барар.
Гаврил Алексеев, "Якутскэнерго" тэрилтэ генеральнай дириэктэрэ: "Дьокуускайдааҕы ГРЭС үһүс ресурсун түмүктээн эрэр. Манна кэккэ боппуруостары федерельнай таһымҥа таһаарбыппыт, быһаарыаллыахтара диэн эрэллээхпит".
Салгыы Айсен Николаев Өрөспүүбүлүкэтээҕи онкология киинигэр сырытта. Сыл иһигэр 100-тэн тахса тыһыынча киһи бырааска көрдөрүммүт. Үрдүк технологиялаах, эрдэ манна кыайан оҥоһуллубат эпэрээссийэлэри ыытар кыахтанан, эмтээһин таһыма үрдээбитин быраастар бэлиэтииллэр.
Үлэ хаамыытынан Ил Дархан саҥа тутулла турар 1№-дээх оскуоланы көрдө. Киин куорат ортотугар турар саҥа үөрэх кыһата 4 мэндиэмэннээх, 6 тыһыынчаттан тахса квадратнай миэтэрэ иэннээх. Манна анал кылаастар, киэҥ-куоҥ дьарыктанар саалалар, оҕо үөрэнэригэр, сайдарыгар туох баар усулуобуйа барыта тэриллибит.
Гаврил Леонтьев, Дьокуускайдааҕы үөрэх салалтатын салайааччытын солбуйааччы: "1-11 кылаас оҕолоро үөрэниэхтэрэ. Оскуола бэйэтэ туспа хайысхалардаах. Оскуола толору хааччыллан турар. Бастакы этээскэ алын кылаастар, 2-3 этээстэргэ сүрүн үөрэх барыа, спорт уонна аактабай саала холбуу оҥоһулунна".
Саҥа оскуола үлэҕэ киирэрин үөрэнээччилэр, учууталлар уонна төрөппүттэр олус диэн күүтэллэр. Көрсүһүүгэ төрөппүттэр Айсен Сергеевичка бэйэлэрин этиилэрин, баҕа санааларын эттилэр. Инникитин оскуолаҕа доруобуйа эйгэтин өттүнэн анал кылаастары арыйар былааннаахтар.
Леонид Ким, төрөппүт: "Оҕолорбут киһи уонна айылҕа ситимнэһиитин өссө дириҥэтэн билэллэрэ буоллар диэн баҕарабыт. Медицинскэй хайысхалаах кылаастар баар буолууларын өйүүбүт".
Тутуу үлэтэ түмүктэнэн эрэр, күүтүүлээх саҥа оскуола аана бу саас арыллыаҕа. Быйыл бу үөрэх кыһата үбүлүөйдээх 105 сыла. Онон улахан суолталаах бэлиэ сылга, саҥа оскуола үлэҕэ киирэрэ, оҕолорго дьоһун бэлэх буолуоҕа.
