Улахан тымныы арыый намыраата, ол эрээри күүһүн син биир ыыппат

Киин куоракка сыл бүтэһик нэдиэлэтэ аҕыйах да кыраадыһынан сылыйыыттан саҕаланна. Туман уҕарыйан, харахтан сыыһы ылбыт курдук буолла. Өҥүрүк да куйааска, томороон да тымныыга уокуруктар муниципальнай дворниктарын үлэлэрэ тохтообот.

Иннокентий Сивцев, Октябрьскай уокурук муниципальнай дворнига: «Тымныыны тымныы диэбэккэ үлэлиибит. Куорат сайдарын туһугар кыһаллабыт, ыраас буоллун диэн бөх хомуйабыт. Уонна оҕо былаһааккаларын хомуйабыт».

Маннык хас биирдии уокурук дворниктара бэйэлэрин территорияларын көрөллөр-истэллэр, ыраастыыллар. Оҕо былаассааккаларын бөҕүн эмиэ хомуйаллар. Салгыы бу сатыы дьон сылдьар сирин кэннэ атын сиргэ тиийэн эмиэ хаары кытта үлэлииллэр.

Владимир Чемезов, Октябрьскай уокурук муниципальнай дворнига: «Биһиэхэ исписээлинэй таҥас биэрэллэр, атах таҥаһа уонна үтүлүк. Массыынанан таһаллар үлэлиир сирбитигэр».

Ыйы быһа харахпытын өрө көрбөккө  туман быыһыгар будулуйар -45-50-ча кыраадыска олордубут. Ааспыт өрөбүллэргэ Охотскай муораттан сис былыт кэлэн хотугулуу-илин улуустарынан ааһан хаары аҕалла. Бу былыт Лаптев муоратыгар тахсан муора кытытыыгар чуолаан Булуҥ, Анаабыр улуустарыгар улахан тыал түстэ, ол курдук тыал күүһэ сөкүүндэҕэ 24 миэтэрэҕэ тэҥнэстэ. Сыл бүтэһик күннэригэр дьон бары сылыйыыны күүтэр эрээри, кыраадыс үрдүүр санаата суох.  

Саргылаана Никитина, Дьокуускайдааҕы күнү-дьылы кэтээн көрөр сулууспа күн-дьыл туругун сылыктыыр салаатын салайааччыта: «Ахсынньы ый бүтэһик күннэригэр дабылыанньа үрдээн тымныы күүһүрүө. Түүҥҥү температура -42-47, хотугулуу-илин -48-53 кыраадыс. Күнүскү температура -40-45 кыраадыска дылы тымныйа. Тохсунньу 1-2 чыыһылатыгар Красноярскай кыраайтан циклон тахсан арҕаа, соҕуруу-арҕаа оройуоннарга хаардаах сылаас күн-дьыл сабаҕаланар».

Ити курдук саҥа үүнэр сыл бастакы күннэригэр чуолаан тохсунньу биир, икки чыыһылатыгар арҕаа, соҕуруулуу-арҕаа улуустарга кэм сылыйан ылыа. Саҥа Дьыл сүпсүлгэнин оройо. Барыы-кэлии тэтимирдэ. Ырыынакка атыы-тутуу үгэнэ. Халлаан сылыйыытын атыыһыттар эмиэ күүтэллэр.

Леонид Аммосов, бааһынай хаһаайыстыба салайааччыта: «Күн –дьыл алдьархай тымныы турда. Циклон кэлэн сотору сылыйа, Саҥа дьылга оруобуна сылааска буолуо».

Быйыл ахсынньы бэрт тымныы турда, тохсунньу да улаханнык сылыйбата буолуо, ороһуоспа, кириһиэнньэ тымныылара үүнүөхтэрэ турдаҕа.