Саҥа сылы көрсө Мэҥэ Хаҥалас улууһун олохтоохторо бэлэх туттулар

Мэҥэ Хаҥалас улууһун олохтоохторугар үөрүүлээх түгэн. Киэҥ-куоҥ, сылаас, сырдык балыыһа икки мэндиэмэннээх, 1200-тэн тахса квадратнай миэтирэ иэннээх. Мантан ыла быраастар күҥҥэ 100 киһини көрөр кыахтаныахтара. Саҥа эбийиэк арыллыытыгар Ил Дархан Айсен Николаев кыттыыны ылла.

Балыыһа аныгы медицинэ тэриллэринэн хааччыллыбыт. Анал лабораториятыгар тиийэ оҥоһуллубут. Амбулаторнай, көрдөрүнэр уонна эмтиир салаалаах.

Евгения Захарова, улуус балыыһатын сэбиэдиссэйэ: «Балыыһа тутулларын олус өр кэтэстибит. Наһаа үчүгэй, сып-сырдык, сып-сылаас. Манна 40 үлэһит баар, суһал көмө салаатыгар 12 киһи үлэлиир».

Өр күүтүүлээх саҥа балыыһа бу эҥэргэ киирэрэ улахан суолталаах буолар. "Уһун уонна көхтөөх олох" национальнай бырайыак чэрчитинэн тутуллан киирдэ.

Георгий Степанов, СӨ бырабыытылыстыбатын бэрэссэдээтэлин солбуйааччы: «Аллараа Бэстээх турар сирэ – 3 федеральнай суол төрдүгэр турар буолан сүрдээх улахан суолталаах. Манна нэһилиэнньэ сыл аайы элбии турар. Дьокуускай куоракка чугас турар буолан киһи кэлиитэ-барыыта элбэх. Саҥа балыыһаҕа көмө барыта оҥоһуллар, ону таһынан манна туспа суһал көмө салаата тэрилиннэ».

Улууска өссө биир саҥа эбийиэк- элбэх хайысхалаах дьиэ кэргэн киинэ буолар. Манна дьиэ кэргэн, кыра оҕотуттан саҕалаан, аҕам саастаах киһиэхэ тиийэ биир сиргэ кэлэн араас хайысхаҕа көмөнү, сүбэни ылар кыахтаныахтара.

Айсен Николаев, СӨ Ил Дархана: «Биһиги дьиэ кэргэни өйүүр бэлиитикэни ыытар буоллахпытына, хайаан даҕаны маннык кииннэр наадалар. Бу үлэ хас да сыл өрөспүүбүлүкэбитигэр бара турар. Маннык кииннэр үлэҕэ киирэннэр, бэйэлэрин туһалаахтарын көрдөрдүлэр уонна дьоҥҥо наадалаах».

Үлэ хаамыытынан Ил Дархан Айсен Николаев бу сылга хаарбах дьиэттэн көһөрүү быраграаматынан үлэҕэ киирбит дьиэҕэ ыалдьыттаата. Элбэх оҕолоох Дмитриевтар дьиэ кэргэн сырдык, сылаас саҥа дьиэҕэ көспүттэриттэн үөрүүлэрэ муҥура суох.

Екатерина Дмитриева, Мэҥэ Хаҥалас улууһун олохтооҕо: «Утары турар дьиэттэн көһөн киирбиппит. Дьиэбит ыраас, сырдык, сылаас. Оҕолорбут туспа хостоннулар. Бу бырагыраама үлэлиирэ наһаа үчүгэй, элбэх дьиэ кэргэн дьиэлэннэ-уоттанна. Салҕана бара турарыгар баҕарабыт».

Бу саҥа эбийиэктэр тутуулара Дойду Президиэнэ Владимир Путин көҕүлээбит анал быраграаматынан олоххо киирдилэр.  Быйыл Саха сиригэр тутуу үлэтэ былаанын куоһарда, уопсайа 40-чэ улахан суолталаах, социальнай эбийиэк тутуллан үлэҕэ киирдэ.