Лөкөчөөн уран тарбахатаах норуот маастара талаанын инники көлүөнэҕэ тириэрдэр

"Ай-Тик" айар куруһуок саҕалааччы иистэнньэҥнэрэ айар кут абылаҥар олороллор. Бүлүү улууһун Лөкөчөөнүгэр норуот маастара Феодосия Григорьева салайыылаах иис бөлөҕө оскуола оҕолорун түмэр. Маныаха кыргыттары иис эйгэтигэр уруок быһыытынан 5 кылаастан саҕалаан 11 диэри  эмиэ үөрэтэр.

Лөкөчөөн орто оскуолатын 6 кылааһын үөрэнээччитэ Алексена Петрова манна сөбүлээн дьарыктанар. Номнуо 6 кылаас оҕото кыбытык ньыманан тигэри сатыыр, кылынан, сиэлинэн үлэлиир. Уһуйааччыбыт олус үчүгэйдик үөрэтэр, быһаарар диэн кэпсиир. Билигин оскуола түмэлигэр бэриллэр оҥоһугу оҥоро сылдьаллар.

Алексена Петрова, Лөкөчөөн орто оскуолатын 6 кылааһын үөрэнээччитэ: «Биһиги панно тигэ сылдьабыт. Балаҕаммыт 25 сыла буоларыгар».

Феодосия Григорьева 2024 сыллаахха норуот маастарынан ааттаммыта. Кини ииһин ураты буочара оҥоһуктарыгар көстөр. Ордук кылынан үлэлиирин ордорор. Маастар үлэлэлэрэ улуус эрэ иһигэр буолбакка, бүтүн Өрөспүүбүлүкэ таһымыгар дьон дьүүлүгэр турбута.  Онтон бу барыта 25 сыллааҕыта саҕаламмыта диэн Феодосия Афанасьевна кэпсиир.

Феодосия Григорьева, норуот маастара: «2000 сылтан кылтан, сиэлтэн иистэммитим. Араас көбүөрдэри, паннолары, сөрүөлэри оҥорбутум. Эбии үөрэхтээһининэн Ай-Тик диэн куруһуоктаахпын. Онно оҕолору 5-8 кылааска дылы үөрэтэбин. Сукунаны араас өҥүнэн кыбытаммыт араас олбохтору тигэбит. Сылгы сиэлиттэн, кылыттан эмиэ тигэбит».

Кыра эрдэхтэн оҕолору, чуолаан кыргыттары иискэ сыһыарыы инникки олохторугар олус наадалаах диэн Феодосия Афанасьевна тоһоҕолоон этэр. Билигин 5 саҕалаан кэрэ аҥар үөрэнээччиллэр манна сүрэҕэлдьээбэккэ, үөрэ-көтө кэлэллэр. Араас оонньуурдары, таҥас-сап, олбохтору тигэллэр.

Иванна Яковлева, Лөкөчөөн орто оскуолатын 6 кылааһын үөрэнээччитэ: «Сукунаттан тигэбит. Салайааччыбыт үчүгэй баҕайытык үөрэтэр. Тигэрбин олус сөбүлүүбүн».

Бу курдук иистэнньэҥ, уран тарбахтаах Феодосия Григорьева бу курдук талаанын оҕолорго иҥэрэ, айа тута сылдьар.