Өрөспүүбүлүкэ социальнай эбийиэктэригэр ыксаллаах быһыы майгы тахсар түгэнигэр бэлэм буолууну тургуталлар

Уот ситимиттэн онкологическай балыыһа 2 этээһигэр,  архыып хоһугар уот турбут. Бу курдук үһүйэннээх Саха сирин баһаарынай сулууспаларын улахан, киэҥ далааһыннаах тактическай үөрэтиилэрэ саҕаланар.

Ыксаллаах быһыы-майгы министиэристибэтин баһаарынай карауллара бу күн уустук соруктары толороллор. 120 кыбадыраатынай миэтирэ иэннээх баараҕай тутууга уоту умулларыы уонна эмсэҕэлээччилэри быыһааһын инники күөҥҥэ турар. Манна балыыһа үлэһиттэрэ баһаарынайдары кытары биир тэҥник, суһаллык үлэлииллэр.

Ксения Филатова, СӨ онкологическай диспансерын ыарыһахтары көрөр-истэр салаатын сүрүн медицинскэй сиэстэрэтэ: «Үөрэтии буола турар. Бастатан туран ыарыһахтары, үлэһиттэри эвакуациялаатыбыт. Эвакуация пууна – гараж. 150 курдук киһини эвакуациялаатыбыт».

150 киһини өссө эбиитин ыалдьар дьону эбиийэк иһиттэн таһаарыы бу улахан үлэ буолар. Манна балыыһа үлэһиттэрэ түргэттэрин көрдөрдүлэр. Ол эрэн үһүйээн быһыытынан син биир тахсыбакка хаалбыт дьон бааллар. Олору байыастар көрдүүр соруктаахтар. Аҕыйах мүнүүтэ иһинэн бастакы эмсэҕэлээччи көстөр. 

Баһаарынай -быыһааччы Ньургустаан Протопопов бу күн бэйэтин бөлөҕүн салайда. Иккис эттэскэ хара буруо тахса турарын көрөн, байыастары онно ыытта. Саамай сүрүн сорук - дьону быыһааһын манна буолар диэн иһитиннэрдэ.

Ньургустаан Протопопов, 1№-дээх баһаарынай -быыһыыр чаас 5 этэрээтин караулун начальнига: «Условный пожар локализован, обнаружено 5 пострадавших, эвакуированы в медучреждения».

Манна даҕатан эттэххэ, саҥа онкологическай балыыһа олус улахан эбийиэк буолар. Маннык үөрэтии аан бастакытын ыытыллынна. Балыыһа  3 этээһинэн тайаан сытар, эриирдээх-бутуурдаах коридордардаах, үгүс элбэх кабинеттардаах. Онон быыһааччылар хас биирдии этээһи сиһилии көрдүлэр, ханан эвакуацияланар ааннар баалларын барытын бэлиэтээтилэр. Үөрэтии барыта хамаанданан, этиллибит соруктарынан ыытыллынна.

Михаил Булкин, ЫБММ Саха сиринээҕи салалтатын  баһаары умулларыы сулууспатын салайааччытын солбуйааччы: «5 федеральнай баһаар утары сулууспа этэрээттэриттэн кэлэ сылдьаллар. Ону тэҥэ Өрөспүүбүлүкэтээҕи баһаарынай сулууспа үлэһиттэрэ бааллар уонна Сүрүн управление үлэһиттэрэ».

Туруоруллубут сорук барыта толорулунна. Эмсэҕэлээччилэр бары быыһанныллар. Үөрэтии "үчүгэйинэн" ааҕылынна.