Кэлэр сыл Саха сиригэр култуура сылынан биллэрилиннэ

Ил Дархан Айсен Николаев сыл түмүгүн таһаарар, кэлэр сыл кэскиллээх былааннарын торумнуур анал туһаайыыта. Ил Дархан ханнык да хайысханы туора көппөтө. Ахсыс төгүлүн ыытыллар анал туһаайы икки чаас кэриҥэ барда.

Быйыл Өрөспүүбүлүкэҕэ тутуу үлэтэ тэтимнээхтик барда. Хаарбах дьиэттэн көһөрүү, саҥа социальнай эбийиэктэри олоххо киллэрии үрдүк көрдөрүүлээҕэ бэлиэтэннэ. Маныаха национальнай бырайыак чэрчитинэн барар үлэ 2030 сылга диэри салҕанар.

Виктор Романов, СӨ тутуу миниистирэ : «Икки сыл дьиэ тутуутугар рекорд көрдөрүүтүн оҥоробут. 800 тыһ. м² курдук уопсай иэннээх дьиэ үлэҕэ киириэҕэ. Социальнай эбийиэктэр тутуулара салҕанар. Президеммыт бигэргэппит маастар-былааннар уонна опорнай пууннар чэрчитинэн киирэллэр».

Маны сэргэ доруобуйа харыстабыла, үөрэх, успуорт эйгэтэ, бырамыссылыннас уонна да атын хайысхалар үлэлэрэ үрдүктүк сыаналанна. Ол курдук тыа хаһаайыстыбатын эйгэтэ быйыл үрдүк көрдөрүүлээх. Үүт, бэйэ оҥорон таһаарыы бородууксуйата хаһаанытааҕар да элбэх оҥоһуллунна. Туорахтаах бурдугу, оту үүннэрии быйыл таһыччы элбээбитэ бэлиэтэннэ.

Артём Александров, СӨ тыа хаһаайыстыбатын миниистирэ: «Инники өттүгэр бу бэриллибит боломуочуйалары иккис таһымынан өссө кэҥэтии буолар. Тохсунньу маҥнайгы күнүттэн 2027 сылтан бу үлэ киирэрин ситиһиэхтээхпит. Ил Дархан улуустарга үлэлии сылдьар урбаанньытар тыа хаһаайыстыбаҕа чугаһаабыттарын бэлиэтээтэ».

Ааһан эрэр 2025 сыл түмүгэ эмиэ сыаналланна. Сыалын-соругун ситтэ. Дойдуга бэриниилээх буолуу, патриотичискэй хайысхалаах үлэлэр, тэрээһиннэр тиһигин быспакка ыытыллыннылар. Анал байыаннай дьайыы кыттылаахтарыгар, кинилэр дьиэ кэргэттэригэр Өрөспүүбүлүкэ өтүттэн өйөбүл тиһигин быспат. Ол эрэн бу салааны салгыы да болҕомто киинигэр тутар наада диэн Ил Дархан бэлиэтээтэ.

Саха сирин ыччата сайдыылаах, бары хайысхаҕа көхтөөх. Болҕомто кэлэр кэнчээри ыччакка эмиэ ууруллунна. Быйыл ыччат хамсааһыныгар элбэх үлэ ыытыллынна, саҥа бырайыактар, элбэх ситиһиилэр.

Пётр Шамаев, СӨ ыччат бэлиитикэтин миниистирэ: «Улуустарга баар исписэлиистэри өйүөхпүтүн баҕарабыт. Ыччат киинин арыйаммыт өйөөрү үлэлэһиэхпит диэн. Федеральнай субсидияларга, грааннарга кыттыахтаахпыт».

Туһаайыы тутаах чааһа. Ил Дархан Айсен Николаев 2026 сылы биллэрэр. 

Саха сиригэр култуура сыла биллэриллиннэ. Бу Өрөспүүбүлүкэ олохтоохторугар улахан суолталаах. Саха норуота  баай, дириҥ историялаах. Үйэлэри уҥуордаан кэлбит биһиги төрүт култуурабытын, үгэстэрбитин илдьэ хааларга уонна үүнэр көлүөнэҕэ тириэрдэргэ улахан суолталаах сыл буолуоҕа.

Сергей Местников, СӨ бырабыытылыстыбатын бэрэссэдээтэлин солбуйааччы: «Киэҥ далаһыннаах биир кэлим былаан олохтуохпут. Бу былаанынан өрөспүүбүлүкэҕэ олорор норуоттар култуураларын, саха норуотун култууратын, төрүт үгэһин сайыннарыыга олус суолталаах үлэ-хамнас ыытыллыаҕа. Өрөспүүбүлүкэбитигэр култуура сылын үрдүк таһымнаахтык бэлиэтииргэ бииргэ үлэлэһэргэ ыҥырабыт».

Саха сиригэр бары хайысха эйгэтэ сайдан иһэр. Өрөспүүбүлүкэ да, федаральнай да хааһынаттан салаалары сайыннарарга олус элбэх үлэ ыытыллара туһаайыга бэлиэтэннэ. Ил Дархан этиилэрин, түмүктэрин, былааннарын ыҥырыылаах ыалдьыттар салҕыбакка иһиттилэр. Ол аата регион бүгүҥҥү күннээҕи социальнай-экномиескэй сайдыытын тосхоло сөптөөҕүн туоһута буолар.