Спортивнай түөлбэҕэ элбэх хайысхалаах саҥа спортивнай киин үлэтин саҕалаата

Саҥа спортивнай киин сыл иһигэр тутуллан киирдэ. Манна Спортивнай түөлбэ оҕолоро түөрт сааланан - волейболга, футболга, скалолазанияҕа, боксаҕа уонна тустууга дьарыктаныахтара. Маны таһынан саҥа спортивнай кииҥҥэ нэһилиэньэ этин-хаанын дьарыктанарыгар тренажернай саала тиийэ оҥоһуллубут.

Василий Кычкин, Дьокуускайдааҕы 5-с нүөмэрдээх оҕо спортивнай оскуолатын дириэктэрэ: «Чугас оройуон оҕолоро дьарыктаныахтарын сөп. 1050 оҕону дьарыктыыр былааннаахпыт. Саҥа дьыл кэннэ үлэбитин саҕалыахтаахпыт. Чугас олорор оҕолору ыҥырабыт».

Саҥа спортивнай саала Дьокуускайдааҕы 5-с нүөмэрдээх оҕо спортивнай оскуолаатын салаата буолар. Сүрүн дьарыктар манна ыытыллыахтара. Оҕо дьарыктанарыгар, дьоҕурун сайыннарарыгар туох баар усулуобуйа барыта тэриллибит диэн төрөппүттэр сыаналаатылар.

Виталий Поликарпов, төрөппүт: «Уолум ДЮСШ-5 дьарыктаммыта икки сыл буолла. Манна олорор оҕолорго ДЮСШ арыллыбыта оһуобай диэххэ наада».

Кэнники сылларга нэһилиэнньэ, ыччат спордунан дьарыктанара үксээтэ. Оскуола оҕолоро биир эрэ көрүҥүнэн буолбакка хас да спорт көрүнүгэр дьарыктаналлар. Онон бу саҥа арыллыбыт спорт киинэ саҥа ааттары, чөмпүйүөннэри үүннэрэн таһаарыа диэн кэлбит ыалдьыттар бэлиэтээтилэр.

Айсен Николаев, СӨ Ил Дархана: «Здесь будут вырастать новые чемпионы России. Я уверен, что здесь вырастут новые чемпионы мира и Олимпийских игр. Это всё надо беречь, тренироваться и быть целеустремленными, быть теми людьми, которые хотят менять жизнь к лучшему и у нас в городе, и у нас в республике, и в целом в стране. Идти вперед и никогда не сдаваться».

Бу Дьокуускайга улахан суолталаах социальнай эбийиэк буолар. Дойду Президиэнэ Владимир Путин бигэргитиллибит киин куорат сайдыытын маастар-былааныгар киирбит тутуу буолар.

Леонид Спиридонов, СӨ физическэй култуураҕа уонна спортка миниистирэ: «Манна элбэх оҕо кэлэн эрчиллиэҕэ, биһиги тутуулар уонна спорпут сайдыыта биһиги оҕолорбутугар буолар. Кинилэр ситиһиилээх уонна доруобай буоллуннар диэн бу үлэ хамнас барар. Барыларын саҥа сырдык, ыраас спорт саалата арыллыбытынан эҕэрдэлиибин».

Спортивнай түөлбэ инфраструктурата сайдан иһэр, саҥа эбийиэктэр тутуллан киирэн иһэллэр. Бу саҥа спортивнай саала бу түөлбэҕэ иккис эбийиэк буолар. Оттон эһиил бу түөлбэҕэ саҥа дьиэлэр дьэндэйиэхтэрэ.