Өлүөнэ күргэтэ. Быйылгы үлэ ситиһиилэрэ, кэлэр сыл былааннара

50 кыраадыстаах томороон тымныыны үйэ баараҕай тутуута билиммэт. Өлүөнэ күргэтин тутуу дьыл хайа да кэмигэр тохтообот. Манна  сүрүн, тохсус коффердамы оҥорон саҕалаатылар.

Михаил Акимов, "ВИС Строй" тэрилтэ оҥорон таһаарар техническэй салаатын салайааччыта: «Икки ардын суолун оҥоро сылдьабыт, күүһүрдүү үлэтэ бара турар. Уонна баазаҕа станокка каркас бэлэмнии сылдьаллар, 920 сыбаайаттан 800-чэ бэлэм».

Баараҕай бырайыак олоххо киирэригэр үлэһиттэр сууккаҕа 11 чаас үлэлииллэр. 200-кэ үлэһит,  20 анал тиэхникэ. Үлэ усулуобуйатын тэрийэн сылаас  сыах, анал ыскылаат, гараж баар буолла.

Роман Сидиков, үлэһит : «Очень холодно, да. Сегодня у нас на берегу показало -56 градусов. Работаем 11 часов, также, как и в летнее время, потому что здесь температура положительная и спокойно можно работать».

Төгүрүк сыл болҕомто киинигэр турар тутуу үлэтэ. Кэтэһиилээх эбийиэк. Хас биирдии Саха сирин олохтооҕун хараҕын далыгар оҥоһулунна. Сыл саҥата былассаакка көстүүтэ бу курдук этэ.

Владимир Сивцев, СӨ тыраанспар уонна суол хаһаайыстыбатын миниистирэ: «Быйыл бу өттүгэр 5 фундамент туруо уонна 4 опора».

Онтон Бу атырдьах ыйынааҕы үлэ хаамыыта. 2 биэрэгинэн хамсаныы өссө тэтимирэр. Хас ый ахсын үлэ хаамыытын билсиэ суруналыыстар ыалдьыт буолаллар.

Михаил Акимов, “ВИС Строй” тэрилтэ оҥорон таһаарар техническэй салаатын салайааччыта: «Иккис былассааккаҕа сылдьабыт. Коффердам таҥыыта бара турар».

Салгыы Алтынньы ый хартыыналара. Эмиэ биһиги устар бөлөхпут тутуу эбийиэгэр тиийэр, туох уларыйыы буолбутун билсэр.   Халлаан биллэ тымныйан  саҕалыыр, ол эрэн үйэ тутуута тэтимин ыһыктыбат.

Артем Артемьев, “Ленский мост” дирекция генеральнай дириэктэрэ: «Куорат өттүттэн улахан коффердам оҥоһулунна, диаметра 36 миэтирэ, 102 сыбаайаҕа аналлаах».

Бу сыллааҕы былаан ситиһилиннэ, графиктан хаалыы суох. Хаҥас биэрэккэ 71 сыбаайа, 4 тирэх  буттэ, 3 коффердамтан 1 толору бэлэм буолла

Михаил Акимов, "ВИС Строй" тэрилтэ оҥорон таһаарар техническэй салаатын салайааччыта: «920 сыбаайа түһүөхтээх, билиҥҥи туругунан 800-кэ каркас бэлэм. Уһуннара 41 миэтирэ, 50 тыһ. м³ бетон кутуллуохтаах».

Тыйыс усулуобуйа аахсыллыбат. Манна эрдэттэн үрдүк таһымнаах бэлэмнэнии баар буолан, дойду үрдүнэн ханна да туттулла илик ньымалар олоххо киирэллэр. Үйэ баараҕай тутуутун үлэтэ эһиил бу тэтиминэн салҕанар.