Дьокуускайга бэйэни салайыныы сүрүн боппуруостарын дьүүллэһэллэр

Быйылгы Сийиэскэ киин болҕомтону Саха сиригэр олохтоох бэйэни салайыныы туһунан өрөспүүбүлүкэтээҕи саҥа сокуон барылын дьүүллэһиигэ уурдулар. Икки таһымнаах систиэмэ хаалан, регион уратытын, үгэһин учуоттуурга көдьүүстээҕин ыйаллар. Ил Түмэҥҥэ ыытыллыбыт төгүрүк остуолга олохтоох бэйэни салайыныы сокуонун тиһилигэр федеральнай уонна олохтоох таһымҥа баар уларыйыылары ырыттылар.

Валентин Охотин, Таатта улууһун Дьохсоҕон нэһилиэгин баһылыга: «РФ сокуоннарыгар сөп түбэһиннэрэммит, бэйэбит тымныы дойдубутугар дьон үлэлиир-хамсыыр усулуобуйатыгар сөп түбэһиннэрэммит, Ил Түмэн дьокутааттара быһааран төгүрүк остуолга быһааран кэпсээтилэр».

Маныаха билигин уустук усулуобуйаҕа үбү-харчыны тыырыы, көрүү биир саамай долгутуулаах тыын боппуруоһунан буолар.  Судаарыстыбынай бүддьүөттэн тыа хаһаайыстыбатын, арктикатааҕы зона, олох-дьаһах хомунаалынай хаһаайыстыбатын, сир сыһыаннаһыыларын уонна айылҕаны туһаныы эйгэтин үбүлээһинэ киэҥ дьүүллэһиини ылла.

Ньургун Габышев, Мэҥэ Хаҥалас улууһун Балыктаах нэһилиэгин баһылыга: «Ааһан эрэр уонна кэлэр сылга тыа хаһаайыстыбатын үбүлээһинин улуустарга бэйэлэригэр биэрбиттэрэ. Сүрдээх табыгастааҕын көрдөрдө. Үүт туттарыы былаанын таһынан толоруллунна. Ол харчыта барыта күн-бэҕэһээ улуустарга тыырыллан, бүгүн номнуо үүт туттарааччыларга тиийиэхтээх».

Чурапчы улууһа тыа хаһаайыстыбатын салаатыгар чуолаан оҥорон таһаарыыга, ынах-сүөһү ахсаанынан биир үрдүк көрдөрүүлээх инники күөҥҥэ сылдьар улууһунан биллэр. Быйылгы дьылга 3 хотон тутан киллэрдилэр, биир буойуна уонна биир арыы сыаҕын астылар.

Анжелика Неустроева, Чурапчы улууһун баһылыгын солбуйааччы: «Быйыл 526 мөл көрүлүннэ субвенция быһыытынан. Үүппүт, төбөбүт ставкатын уларыппатыбыт, барыта нормативынан барда. Быйыл кыра кыамталаах эбийиэктэргэ үп-харчы көрүллэн биһиги 6 эбийиэги тутан киллэрдибит».

Маныаха үбүлээһиҥҥэ  улуустарга боломуочуйа бэрииллибитэ ситэ чопчуланыан, итиэннэ үп-харчы кээмэйэ эбиллэрин туруорсаллар. Салгыы үөрэҕирии, социальнай көмүскэл, култуура, ыччат, патриотическай иитии уонна анал байыаннай дьайыы тематынан ыытыллыбыт үһүс төгүрүк остуолга эмиэ бүгүҥҥү күҥҥэ кыһалҕалаах боппуруостары ырыттылар.

Антонина Григорьева, Ил Түмэн наукаҕа уонна үөрэҕириигэ сис кэмитиэтин бэрэссэдээтэлэ: «Бары түмсэн үлэлээн Арассыыйаҕа лидердар истэригэр баарбыт, ити араас көмө ахсаанынан СВО кыттааччыларыгар. Ол гынан баран ити аҕыйах син биир. Бүгүҥҥү кэпсэтиилэр өссө даҕаны элбэх инники өттүгэр чопчулааһын уонна миэрэ оҥоһуллара кэҥээн биэрэрин көрдүбүт бүгүн».

Сийиэс Пленарнай чааһа бүгүн Опера уонна балет театырыгар ыытыллыаҕа. Ону тэҥэ ыччат парламенынан уонна эдэр дьокутааттар холбоһуктаах сүбэ мунньахтара тэриллиэҕэ.