"Уһун уонна көхтөөх олох" нацбырайыак чэрчитинэн сүрэх-тымыр ыарыыларыгар болҕомто күүһүрэр

Дьокуускай олохтооҕо Алексей Охоносов хроническай сүрэх ыарыылаах. Бу кардиология салаатыгар 3 киирэһиним диэн этэр. Балыыһаҕа медперсонал бэрт болҕомтолоохтук сыһыаннаһар, үчүгэйдик көрөллөр-истэллэр диэн этэр.

Алексей Охоносов, Дьокуускай олохтооҕо: «Эмтииллэрэ үчүгэй. Сиэстэрэ сотору-сотору киирэр, көрөр-истэр. Манна оҕонньор сыппыта. Мин киирэрбэр олох саҥарбат да этэ, кини номнуо тахсан барбыта».

Өрөспүүбүлүкэтээҕи клиническэй балыыһа кардиологияҕа салаата 30 куойкалаах, 6 реанимация миэстэлээх.  Сыллата манна биир тыһыынча киһи киирэн туһааннаах эмтэниини ааһар. Сүрүннээн хроническай сүрэх-тымыр ыарыылаахтары эмтииллэр. Ол курдук сүрэх кыаммат буолуутун, ишемияны, сүрэх тэбиитин кэһиллиитин, үрдүк хаан баттааһыннаахтары көрөллөр-истэллэр. 2022 сыллаахтан балыыһаҕа амбулаторнай кабинет аһыллыбыта.

Саргылаана Степанова, кардиология салаатын кардиолог бырааһа: «Биһиги куораттааҕы кардиологияҕа киирсэбит. Куорат уонна куоракка чугас улуустартан кэлэн эмтэнэллэр. Участковай терапевтар, кардиорлогтар заведующайбытыгар эрийэн суруттарыахтарын сөп, оччогуна киириэхтэрин сөп».

Ыарыһахтар эмтэнэн да тахсан баран кэтэбилгэ сылдьаллар. Салааҕа 60-75 саастаах дьон ордук элбэхтик киирэр. Сүрэх-тымыр ыарыыларыттан өлүү аан дойду үрдүнэн инники кирбиигэ сылдьар. Онон сүрүн болҕомтону эрдэттэн сэрэтии үлэтэ ылар. Нэһилиэнньэ, дьон-сэргэ доруобуйатын туругар кыһаллан ыарыыны аҕыйатыыга үлэлэһэллэр. Маныаха сүрэх ыарыытын сэрэтэр инниттэн хас биирдии киһи хаанын баттааһынын көрдөрүүтүтүн кэтэнэрэ ордук диэн эмчиттэр сүбэлииллэр.

Сардаана Никитина, кардиология салаатын кардиолог бырааһа: «Дьиэҕитигэр хааҥҥыт баттааһынын кээмэйдэнэ сылдьыаххытын наада, уонна сүрэх диагнозтаах учуокка турар буоллаххытына, кардиологкытыгар куруутун көрдөрүнэ сылдьын».

Чинчийии араас оборудованиенан чопчу оҥоһуллар буолар, диагноз туруоруута судургутуйан турар. Манна этиллибитин курдук направлениенан киирэллэр.  Дойду үрдүнэн "Уһун уонна көхтөөх олох"  национальнай бырайыак чэрчитинэн сүрэх-тымыр ыарыыларыгар дойду үрдүнэн болҕомто эбии күүһүрэр. Кэлэр сылга бу хайысханан туһааннаах үлэ салҕанара күүтүллэр.