Дьокуускай куоракка "Патриот" ыччат саҥа киинэ арыллынна

"Патриот" саҥа киин аанын тэлэччи аста. Үс мэндиэмэннээх аныгы кэм ирдэбилигэр эппиэттиир, киэн-куон хостордоох, маны таһынан оонньуур, дьарыктанар хостор тиийэ бааллар. Ыччат бары өттүнэн сайдарыгар, айарыгар-тутарыгар бары усулуобуйа барыта тэриллибит. Саҥа кииҥҥэ Ил Дархан Айсен Николаев сылдьан, ыччат саҥа кииннэммитинэн эҕэрдэлээтэ. 

Айсен Николаев, СӨ Ил Дархана: «Еще раз убедился, что в этом центре есть все. Все, что нужно для того, чтобы молодежь здесь развивалась, шла вперед, между собой общалась, обогащалась, жила и творила по-современному, при этом вырастая настоящими патриотами и нашей Якутии, и нашей великой России. Все здесь для этого создано. Самое главное, чтобы здесь всегда было много молодежи. Искренне этого хочу, чтобы молодежь сюда приходила, общалась, творила и делала добрые дела».

Саҥа кииҥҥэ ким баҕалаах кэлэн сарсыардаттан дьарыктаныан сөп. Манна кэнсиэрдиир улахан саала, эти-хааны дьарыктыыр, успуордунан дьарыктанар анал хостор, коворкинг-киин, ыччат түмсэн кэпсэтэр, санаа атастаһар саалалар, ийэ уонна оҕо сынньанар хоһо тиийэ оҥоһуллубут.

Пётр Шамаев, СӨ ыччат бэлиитикэтин миниистирэ: «Биһиги бу дьиэ эдэр ыччакка иккис дьиэ буолуо диэммит оҥордубут. Кэлэннэр манна сынньаныахтара, бэйэлэрин бырайыактарын олоххо киллэриэхтэрэ. Манна барыта баар: кэнсиэр саалатыттан көмпүүтэр кулуубугар дылы».

Үс этээһинэн хас да былассаакка үлэлиир. Хас биирдии хайысхаҕа уһуйааччы, үлэһит баар. Кинилэр оҕолору, ыччаты кытта биир ситимнээхтик үлэлиэхтэрэ. Оскуола оҕолоро ордук роллердром былассаакканы сэҥээрдэ. Алена Архипова бу саҥа арыллыбыт кииҥҥэ инструктарынан үлэлии киирбит. Мантан ыла ыччат сайын эрэ буолбакка, кыһын эмиэ ролигынан хатаһалыыр кыахтанна диэн үөрэ кэпсиир.

Алёна Архипова, "Патриот" ыччат киинин үлэһитэ: «Туох баар оборуудобанньа барыта баар».

Маны таһынан бу саҥа киин көхтөөх ыччат, волонтердар хамсааһыннара бииргэ түмсэн, үлэлиир сирдэрэ буолуоҕа. Хас биирди хамсааһынна, толору хааччыллыбыт хостору анаатылар.

Николай Абрамов, "Патриот" ыччат киинин үлэһитэ: «Ыччаттар түмсүүлэригэр кабинеттары биэртэлээбиппит. Онно кэлэн 22:00 дылы олоруохтарын сөп».

Дойду Президиэнэ Владимир Путин национальнай сыал биир көрүҥүнэн патриотическай иитиини сайыннарыыга, бу хайысхаҕа үлэни күүһүрдэргэ, усулуобуйаны тэрийии биир сүрүн соруга буолар. Онон маннык киин Саха сиригэр үлэҕэ киирбитэ улахан суолталаах, ыччат сайдарыгар,  дойдутугар бэриниилээх уонна түмсүүлээх буоларыгар төһүү күүс буолуоҕа.