Ахсынньы аам-даам тымныылара салҕаналлар

Бу кыс хаар ортото ыраах хоту Аллараа Халыма улууһун Черскэй бөһүөлэгэр ардах түһэн соһутта. Олохтоохтор бэлиэтииллэринэн кэнники 25 сыл иһигэр бу бастакы түгэн буолар. Халыма Индигиир улуустарыгар Охотскай муораттан сис былыт кэлэн күүстээх хаары аҕалла. Ону кытта бөһүөлэккэ 4 кыраадыска диэри сылыйа сырытта. Бу диэки кыһын соһуччу сылыйыылары бэлэхтиир эбит буоллаҕына, Саха сирин улахан аҥарыгар улахан тымныылар тураллар. 

Саргылаана Никитина, Дьокуускайдааҕы гидрометеорологическай сулууспа күнү-дьылы кэтээн көрөр салаатын салайааччы: «Киин куоракка ахсынньы 16 күнүгэр сөҥүүтэ суох, туманнаах. Түүнүн -47-49, күнүс -44-46 кыраадыс. Ахсынньы 17 күнүгэр сөҥүүтэ суох, туманнаах -46-48 кыраадыс, күнүс -42-44 кыраадыс».

Тымныы туманнаах күн-дьыл суолга-иискэ бэрт кутталлаах. Ордук ыраах айанааччылары болҕомтолоох буоларга ыҥыраллар. Аҥардас Дьокуускайга ааспыт өрөбүллэргэ 15 саахал бэлиэтэннэ. Маны тэҥэ суол быраабылатын кэһиитинэн 400-тэн тахса административнай матырыйаалы толордулар, 20 суоппар аһыы утах иһиилээх уруулга олорон тутулунна.

Жанна Макарова, Дьокуускайдааҕы суол судаарыстыбаннай иниспиэксийэтин өйдөтөр-сырдатар үлэҕэ салаатын иниспиэктэрэ: «Суол бары кыттыылаахтара суол бары усулуобуйатын кэтээн көрүҥ. Суоппардарга чолоон санатыам этэ: сөптөөх оскуораһы, дистанцияны тутуһа сылдьын диэн. Хайаан даҕаны айанныаххыт иннинэ тимир көлөҕүт туругун кэтээн көрүҥ уонна фараларгытын холбуургутун умнуман».

Куорат хойуу тумаҥҥа бүрүллэн, дьон-сэргэ, түргэн хаамыынан наадатынан сылдьар. Маныаха автобус сылаас тохтобуллара бааллара элбэх дьону абырыыр, дьон тымныыттан кэм иттэр кыахтаах.

Өрөспүүбүлүкэтээҕи 2 нүөмэрдээх балыыһа ожоговой киинигэр үлүйэн киирээччи ахсаана элбээтэ. Сылга ортотунан 200-чэкэ киһи үлүйүүлээх киирэр.

Семён Алексеев, Ожоговай киин ординатор бырааһа: «Сезон саҕаланна, халлаан тымныйда. Номнуо оройуоннартан кэлэтэлээтилэр, манна эмиэ бааллар. Билигин урукку дьыллары кытта тэҥнээтэххэ арыый аҕыйах киһитэ».

Бэрт тымныы турар буолан оскуола үөрэнээччилэригэр актированнай күннэр салҕаналлар.