Дьокуускайга "Доруобуйаларыгар хааччахтаах оҕолор төрөппүттэрин Күннүгэ" диэн бырайыак сүрэхтэниитэ буолла

Орто Халыма улууһуттан сылдьар Дмитрий Асекритов аутизм диагностаах оҕолоох. Оҕолорун дьарыктыыр, реабилитациялыыр, тустаах усулуобуйа тэрийэр сыаллаах кэргэнинээн 4 сыллааҕыта Орто Халыма улууһуттан киин куоракка көһөн кэлбиттэрэ. Быйыл "Доруобуйаларыгар хааччахтаах оҕолор төрөппүттэрин Күннүгэ" диэн бырайыакка кыттан бэйэлэрин тус уопуттарын кытта үллэһиннилэр.

Дмитрий Асекритов, Дьокуускай олохтооҕо: «Дневник кэргэммин кытта суруйбуппут. Атын дьон остуоруйатын аахпыппыт. Кэрэгммин кытта кытынныбыт, дьону кытта үллэстээри».

Бу “Обнимаю сердцем” аһымал пуонда бырайыага бүтүн дойду биһирэбилин ылан стратегическай кеҕүлээһин агентствотын биир тутаах бырайыгын быһыытынан биһирэммитэ. Манна хас биирдии ураты оҕолоох төрөппүт бэйэтин олоҕун-дьаһаҕын, оҕотун хайдах иитэрин, күннээҕи түбүктэрин туһунан күннүккэ тиһэн испитэ. Саха сирин эрэ буолбакка дойду атын регионнарытан төрөппүттэр кыттыһан күннүк суруйан, бырайыак бүтүн кинигэ буолан таҕыста.  

Георгий Степанов, СӨ бырабыыталыстыбатын бэрэссэдээтэлин солбуйааччы: «Быйылгы сылга благотворительнай пуонда үлэтэ-хамнаһа бүтүн Арассыыйа үрдүгэр билиниини уонна биһирэбили ылла. Ол курдук, стратегическэй инициативалар агентстволара ыытар сыллааҕы бүтүн Арассыыйатааҕы куонкурус лидердара буоллулар. Ол иһин бүгүн мустан, бары кыттыгастаах дьоннор өссө инникитин хайдах үлэбитин салҕыыбыт диэн сүрүн ыйытыыларга эппиэттэри булуохтаахпыт».

Бырайыагы сүрэхтиир тэрээһиҥҥэ төгүрүк остуол буолла. Манна Саха сирин салалтатыттан, федеральнай киинтэн экспердэр кытыннылар. Мунньахха сүрүн болҕомтону инклюзивнай практика сайдар суолларыгар уурдулар. Ол курдук доруобуйаларыгар хаачахтаах оҕолор төрөппүттэригэр көмө-тирэх буоларга туох ирдэнэрин дьүүллэстилэр.

Сахаяна Петрова, "Харысхал" аһымал фонд салайааччыта: «Бу “Харысхал” пуонда уонна “Обнимаю сердцем” пуонда ыкса үлэлэһэбит. Саха сиригэр доруобуйатыгар хааччахтаах оҕолору кытта үлэлэһэр пуонда уонна НКОлар элбэхтэр. Сарсын биһиги “Харысхал” пуонда икки бырайыак көмүскүүбүт».

Күннүктэртэн тиһиллибит кинигэ Дьокуускайы тэҥэ, Москваҕа, Санкт-Петербург куоракка сүрэхтэниэҕэ. Кинигэҕэ төрөппүттэр ураты уопуттарын кытта билсиэххэ сөп, ону тэҥэ инбэлиитинэстээх оҕону иитиигэ көрүүгэ-истиигэ сүбэ-ама ылан, баар кыһалҕалары быһаарыыга көмөлөр сыаллаах.