20 сыл бииргэ көрөөччү туһугар үлэлиибит

ВГТРК Саха сиринээҕи филиала эҕэрдэлэри тутар. 20 сыл бииргэ. Өрөспүүбүлүкэ сүрүн сонуннара бу кэм устата күөх экраҥҥа. "Сахамедиа" уораҕайыгар, үөрүүлээх быһыыга-майгыга ГТРК "Саха" кэллэктиибэ бэлиэ даатаны уруйдаата. Бу күн үлэһиттэргэ наҕараадалар туттарыллынныллар, эҕэрдэ тыллар этиллиннилэр.

20 сыл устата бииргэ үлэлэспит биэдэмистибэлэр, тэрилтэлэр кэлэн кэллэктииби эҕрдэлээтилэр. Бу  күн "Телевидиение уонна радио" туйгуннара өр сыл бэриниилээхтик, үтүө суобастаахтык үлэлээбит кэллиэгэллэрбитигэр бэлиэлэр туттарыллыннылар. Бу эйэгэҕэ биир сыаналаах наҕараада хаһаайыттарын булла.

Алёна Анисимова, ГТРК "Саха"  шеф-редактора: «Бу наҕарааданы ылбыппыттан наһаа үөрдүм. Телевидиение туйгуна буоларым өр сыллааҕы үлэм түмүгэ. Бииргэ үлэлиир кэллиэгэлэрбэр, үлэбит өссө таһаарыылаах буоллун, өссө элбэх ситиһии кэлэ турдун диэн баҕарабын».

Бу күн ытыктыыр, үйэ чиэппэрин үлэлээбит дьоммут эмиэ ыалдьыт быһыытынан кэлиллэр. Кинилэргэ сүгүрүйэн, махтанан туран эмиэ эҕэрдэ тыллар этилинниллэр. ГТРК "Саха" бэтэрээнигэр Василий Николаевка "Саха Республикатын бочуоттаах аҕам киһитэ" диэн үрдүкү бэлиэ туттарыллынна. 

Аан бастакытын "Вести -Саха" информационнай биэрии 2005 сыл  кулун тутар 14 кунугэр эпииргэ тахсыбыта. 20 сыл устата биһиги киэҥ нэлэмэн Өрөспүүбүлүкэ күөх экраанын кэтэһиилээх биэриитэ, ГТРК "Саха" уус-уран кэллэктиибэ үтүө ыалдьыт буолбуттара. Бу күн култуура эйгэтиттэн бэлиэни хампаанньа тэриллиэҕиттэн үлэлии сылдьар Татьяна Николаева тутта.

Татьяна Николаева, ГТРК "Саха" корреспондена: «Мин санаабар маннык үрдүк наҕараадаҕа тиксии өссө улахан эппиэтинэс дии саныыбын. ГТРК "Саха" хампаанньа 20 сылынан итиитик-истиҥник эҕэрдэлиибин».

104,9 долгуҥҥа ГТРК "Саха" радиота көрөөччүлэргэ эмиэ үлэлиир. Бэлиэ даатанан радио кэллэктиибин үлэтин түмүгэ бу кун үрдүктүк сыаналанна. 

Кыыдана Иванова, ГТРК "Саха" радио салаатын шеф-редактора: «Радио үлэһиттэрэ наҕараада ыламмыт үөрүүбүт үгүс. 20 сыл устата хампаанньабыт үлэлээн кэллэ. Телевидение уонна радио бииргэ 20 сыл устата бииргэ үлэлээн кэллилэр».

Өрөспүүбүлүкэҕэ инновацияҕа, сыыппара сайдыытыгар уонна инфокоммуникационнай технологияларга миниистирэ Петр Николаев биһиги тэрилтэбит Саха сирин информационнай эйгэтин тэрийиигэ улахан үлэни оҥоро сылдьарын тоһоҕолоон эттэ. Чахчы, Өрөспүүбүлүкэ олоҕор күннэтэ буола турар быһыыны-майгыны сөптөөхтүк, оруннаахтык көрөөччүгэ тириэрдии бу ГТРК "Саха" хампаанньа үлэтин сүрүн оҥкула.

Ирина Гоголева, ГТРК "Саха" дириэктэрэ: «За эти 20 лет мы прошли такой огромный путь и даже иногда не верится, что неужели это всё с нами происходит. Но это только начало. 20 лет это очень мало, поэтому мы всегда будем стремиться, развиваться и впереди только настоящее светлое будущее».

Биэрии сиэккэтэ, формат уларыйар - ол эрэн хас эмэ сыл устата ууруллубут оҥкул уларыйбат. Күннэтэ телевидение улэһиттэрэ көрөөччүлэр буола турар соннунары билэ-көрө, ону интриэһинэйдик тириэрдэргэ кыһаллан туран үлэлииллэр.