Улуустарга сыыйа-баайа өрүһүнэн кыһыҥҥы суоллар аһыллан үлэҕэ киирэллэр

Ааспыт нэдиэлэҕэ уонна бу күннэргэ өрүс уҥуор суол туорааһыннара аһылыннылар. Ол курдук ахсынньы 8 күнүттэн Өлүөнэ өрүскэ Нам улууһугар, итиэннэ Томпоҕо Алдан өрүскэ уонна Кэбээйигэ Хатыҥ Үрэх- Кальвица хайысханан 3 туоннаҕа диэри тыраанспар сырыыта көҥүллэннэ. Бүгүҥҥү күҥҥэ өрөспүүбүлүкэ үрдүнэн 20 өрүс суола аһылынна. Онтон сорох учаастактарга бэлэмнэнии үлэлэрэ бара тураллар. 

Пётр Лугинов, СӨ массыына суолларын салалтатын суолу үлэлэтиигэ салаатын сүрүннүүр эксперт-исписэлииһэ: «Булун оройуонугар Тиксииттэн Найбаҕа дылы барар суолу арыйар үлэ бара турар. Ону тэҥэ Бүлүүттэн Эдьигээҥҥэ дылы барар суолга үлэ бара турар. Удачнайтан Анаабырга дылы барар суолга муус кээмэйдээһинэ бара турар».

Ааспыт субуота күн киэһээ Амма суолугар 2 км тэйиччи сытар, суол таһымыттан үрдүк сиргэ турар күөл тоҕо баран уу суолу үрдүнэн охсубута. Тута бэдэрээччит тэрилтэ тиийэн ууну туоратар, суолу үрдэтэр үлэлэри ыыппыта даҕаны, уу содулун толору тохтотор кыаллыбатаҕа.

Пётр Лугинов, СӨ массыына суолларын салалтатын суолу үлэлэтиигэ салаатын сүрүннүүр эксперт-исписэлииһэ: «Суол үрдүннэн аргыый уу устар, бүтэ илик. Сырыы баар. Уу тохтоотоҕуна үлэ барыта оҥоһуллуо».

Оттон Дьокуускай-Аллараа Бэстээх сүрүн хайысханан кыһыҥҥы суол ахсынньы бүтүүтэ - тохсунньу саҥатыгар арыллара күүтүллэр. Бу хайысханан уларыйыы үлэлэрэ бараллар. 

Семён Коркин, СӨ тыраанспар миниистирин солбуйааччы: «Дьокуускай – Аллараа Бэстээх суолга үлэ бара турар».

Нэдиэлэ саҥатыттан Хатас-Павловскай хайысханан туоннаһы 10 туоннаҕа диэри үрдэттилэр. Билигин бу туорааһыҥҥа саппаас балаһалары оҥорор үлэлэр салҕаналлар. Ол курдук бэдэрээччит тэрилтэлэр икки өттүттэн тиэхиникэ көмөтүнэн ууну ыһан муус оҥорон тэҥнииллэр.

Илья Антонов, суол оҥорор тэрилтэ үлэһитэ: «Суолбутугар күн аайы уу кутабыт. 10-15 см халыҥаан иһэр».

Манна кэлэр нэдиэлэттэн муус халыҥыттан уонна күн-дьыл туругуттан көрөн ыйааһыны 15 туоннаҕа диэри үрдэтэллэрэ күүтүллэр.