Быйыл Борис Федорович Неустроев - Мандар Уус үбүлүөйдээх 80 сааһа

Улуу уус, мындыр толкуйдаах, саха төрүт култууратын, үгэһин үйэтитиигэ үлэлэһэн, олоҕун анаабыт биир тутаах киһибит Борис Федорович - Мандар Уус быйыл 80 сааһын туолла. Үбүлүөйдээх сылга элбэх улахан суолталаах тэрээһиннэр ыытыллыннылар. Онтон биирдэстэрэ киин куоракка.

Ытык киһибит Мандар Уус толкуйун, олоҕу анааран көрүүтэ сирдиир сулус буолан, саха омук олоҕун сырдаттын. Хас биирди эппит тылын, алгыһын иҥэринэн, сөптөөхтүк тутуһан, кини үөрэтиитин үүнэр көлүөнэҕэ тириэрдэр соруктаахпыт. 

Сергей Местников, зампред, СӨ бырабыытылысытыба бэрэссэдээтэлин солбуйааччы: «Кини этиилэрин, тосхоллорун тутустахпытына, бэйэбит төрөөбүт тылбытын, култуурабытын уонна үгэспитин тутустахпытына, омук быһыытынан хайдахтаах даҕаны ыарахан кэмҥэ симэлийиэхпит суоҕа уонна ийэ тылбыт биһиэхэ сүрүн тирэх буолуоҕа диэн кини бэйэтин санаатын этэр».

Бу бэлиэ күн Борис Федорович сүгүрүйээччилэрэ, үөрэнээччилэрэ, чугас дьонноро олохтоохтор тоҕуоруһа муһуннулар. Тэрээһин хас да былассаакканан, хайысханан арахсан барда. Быыстапка, кинигэ сүрэхтэниитэ, уустары кытта көрсүһүү уонна да атын тэрээһиннэр ыытыллыннылар.

Николай Егоров, Баайаҕыын - "Мандар Уус" саха олоҕун көрдөрөр түмэлин дириэктэрэ: «Мандар Уус сахатын омугар бэлэхтээбит сүдү мусуойа үйэ тухары бара туруоҕа диэн эрэнэбит. Саха дьоно сайдарыгар көмөлөһүөҕэ диэн сүрдээҕин эрэнэбит».

Мандар Уус үөрэнээччилэрэ бары түмсэн олохтоохторго маастар-кылаас ыыттылар. Кини үөрэнээччилэрэ бары биллэр уустар, норуот маастардара.

Владимир Егоров, норуот маастара: «Маска биһигини уһуйан бу бары олоробут үөрэнээччилэрэ. Кини үөрүүлээх күнүгэр кэлэн маастар-кылаас көрдөрөбүт».

Таатта улууһун Кыйы нэһилиэгин уус-уран маастара Ульяна Матвеева быыстапкаҕа айан-тутан оҥорбут үлэлэрин көрдөрүүгэ аҕалбыт. Кини былыргы туой иһиттэри Мандар Уус үөрэппит ньыматынан ойуулаан-оһуордаан оҥорор эбит.

Ульяна Матвеева, СӨ уус-уран оҥоһуктарын маастара: «Киниттэн элбэххэ үөрэнэбит, ойуутун-бичигин. Уус киһи ханнык даҕаны көрүҥҥэ буоллун, кини уһуйуута барыта биһиэхэ холобур буолар».

Мандар Уус - Саха киһитэ айыахтаах-тутуотаах, төрүт тылын, үгэһин ханна да баар буоллун киэн тутта илдьэ сылдьыахтаах диэн этэр. Өссө да айарым-тутарым элбэх, саха омук култуурата чэчирии сайдарын туһугар туох баар билэрбин-көрөрбүн саха норуотугар, дьоммор-сэргэбэр анаан хаалларыам диэн этэр.

Борис Неустроев, Мандар Уус, СӨ култууратын үтүөлээх үлэһитэ, тимир ууһа, ойууһут: «Орто Дойдуга мээнэ кэлбэтэхпин. Син биир тугу эмит хайаан даҕаны айыахтаахпыт, оҥоруотаахпыт. Оччоҕуна эрэ биһи иэспитин төлүүбүт. Ол туһугар Үрдүк Айыыларбыт бэйэлэрэ анаан-мэнээн сахалары талааннаах оҥорбуттара».

Борис Федорович үбүлүөйдээх тэрээһиннэрэ манан түмүктэммэттэр, эһиил саас Мандар Уус олоҕун туһунан испэктээкил туруоҕа. Онтон сайын Баайаҕа нэһилиэгэр улахан уустар ыһыахтара буолуоҕа.