Улуу Кыайыы 80 сылыгар анаан "Подвиг в каждом кадре" бэстибээл тэрилиннэ

Бу уһулуччу каадырдарга Аҕа дойду Улуу сэриитин бэтэрээннэрэ олох үөһүгэр сылдьар кэмнэрэ, кинилэр үөрбүттэр-көппүттэр, тыыннаахтар, элбэхтэр. Бу урукку кэм бастыҥ дьонун-сэргэтин үйэлэргэ тиһэн хаалларбыт өҥөлөөх киинэни сөбүлээн устааччылар үлэлэрэ, кинилэр харахтарынан оччотооҕу кэм түгэннэрин көрөр-истэр чиэстээхпит. "Подвиг в каждом кадре" диэн Улуу Кыайыы 80 сылыгар анаммыт фестивалга 70-80 сылларга Саха сиригэр Аҕа дойду улуу сэриитин бэтэрээннэрин устан историяҕа хаалларбыт дьон 13 киинэ докумуоннара кытталлар.

Вера Никифорова, СӨ норуоттарын аудиовизуальнай нэһилиэстибэтин национальнай киинин докумуоннары харайыыга салаатын сэбиэдиссэйэ: «Биһи тэрилтэбит сыл аайы “Республиканский конкурс кинолетописи Якутии” диэни ыытар. Быйыл Кыайыы 80 сылынан сибэстээн атын форматынан ыытан, бэстибээл тэрийэн эрэбит. “Подвиг в каждом кадре” диэн. Сыл саҕаланыаҕыттан үлэ барбыта. 100-кэ матырыйаалтан 13 таламмыт, кыттыыны ылан эрэллэр».

Фестивалга Саха сирин араас улуустарыттан уонна Дьокуускайтан үлэлэр бааллар. Бэл хоту улуустарга 50 сыл анараа өттүгэр кинокамера тутуурдаах сылдьан Кыайыы параатын устубут түгэннэри көрүөххэ сөп. Ол курдук  Орто Халыма улууһугар педагог Николай Егорович Слепцов Улуу кыайыы 40 сыллаах үбүлүөйүгэр анаммыт парааты устан хаалларбыт.

Василий Слепцов, фестивал кыттыылааҕын биир дойдулааҕа, педагог: «Сэрии сылларыгар үлэлээбит колхуос, үлэ, булт бэтэрээннэрэ, Сталин мэтээлин кавалердара көстөн ааһаллар, мин аҕам онно эмиэ көстөн ааспыта, Алексей Васильевич “Кыһыл май” колхуос бэрэссэдээтэлинэн үлэлээбит киһи».

Фестивал  үөрүүлээх аһыллыытыгар  дойду геройа Алексей Петров, Ил Түмэн депутаттара, киинэ сөбүлээн устааччылар чугас дьонноро, аймахтара муһуннулар.  Бу Аҕа дойду Улуу сэриитин бэтэрэннэрин үгүс улуустарга киинэни сөбүлээн устааччылар баар буолан көрөр кыахтаахпыт. Лауреат үрдүк аатын сүкпүт киинэ докумуоннартан биир кыайыылааҕы быһаарыахтара. 

Иван Кривогорницын, СӨ кинематографистарын сойууһун бэрэссэдээтэлин солбуйааччы: «Бастакынан ис туругун көрбүппүт, ханна буолбутун, төһө үчүгэйдик уһулбуттарын. Иккис, саамай сүрүнэ – хаачыстыба. Биһи профессиональнай өттүн көрө сатаабыппыт. Ону көрөн Гран-при талыллыбыта».

Түмүккэ, фестивал ларуеаттарын кинилэр чугас дьонноругар туттаран бэлиэтээтилэр. Онтон Дьокуускайтан Эдуард Тирский устуута кылаабынай бириискэ тигистэ. Киин куорат 70-80 сыллардааҕы парааттарын, бэтэрэннэрин кини хараҕынан көрөр кыахтаахпыт.