Тыа сирин олоҕо оскуола тула

Үөрэх баар-бараммат баай. 1909 сыллаахтан историялаах Тааһаҕар орто оскуолата Бүлүү улууһун биир тарбахха баттанар үөрэҕин кыһата буолар. Билигин манна 70 оҕо араас өттүттэн билии ылар, эргиччи дэгиттэр буоларга туһулаан манна үөрэтэллэр.

Ольга Каратаева, Н.Н.Каратаев аатынан Тааһаҕар орто оскуолатын саха тылын учуутала: «Норуот педагогиката суолталааҕын өйдөөммүт Эркээйи Эргиирэ диэн өрөспүүбүлүкэтээҕи бырагыраамаҕа пилотнай оскуола буолабыт. Бу бырагырааманан биһиги оскуола эрэ буолбакка, нэһилиэк бүттүүн үлэлиир. Ол курдук 2024 сыллаахха Эркээйи Эргиирэ бырагыраама айар бөлөҕө оҕо уонна ыччат сайдар тэрийии ньымалар диэн өрөспүүбүлүкэтээҕи семинар тэрийэн ыыппыппыт».

"Туску" инновационнай былаһаакка манна 2016 сыллаахтан олоххо киллэриллэн, этнопедагогиканы дьүөрэлээн оҕолорго сахалыы тыыны иҥэрэллэр. Холобура, сылын аайы оскуола атыыр муҥхата аҕалары уонна уолаттары түмэр сомоҕолуур. Быйыл эбэ үчүгэйдик күндүлээтэ.

Маны кытары тэҥҥэ хас биирдии оҕо төрөөбүт нэһилиэгин историятын, тумус туттар дьонун билиэхтээх диэн санаанан салайтаран манна түмэл үлэлиир. Оскуола мусуойун 32 сылын оскуолаҕа үлэлиир Альбина Григорьева көрөр-истэр.

Альбина Григорьева, Н.Н.Каратаев аатынан Тааһаҕар орто оскуолатын алын сүһүөх кылааһын  учуутала: «Тааһаҕартан төрүттээн өрөспүүбүлүкэҕэ аатырбыт дьоннор тустарынан мунньаммыт оҥордубут. Бастатан туран, Павел Петрович Харлампьев ревкомовец буолбута, Сэбиэскэй былааһы олохтообута. Кини Степан Максимович Аржаков соратнига буолар. Каратаев Игнатий Иванович өрөспүүбүлүкэҕэ биллэр Сэрии бэтэрээнэ, педнаука кандидата уонна азбука уонна саха тылын автора буолар».

Маны кытары оскуолаҕа Ийэ Дойдуга бэриниилээх буолууну иҥэрэр соруктаах Росгвардия, ыксаллаах быһыы-майгы министиэристибэтин итиэннэ Юнармия кабинеттара арыллыбыттара. "Бастакылар хамсааһыннара", "Орлята России" Дойду таһымнаах тэриллииллэр эмиэ манна улэлииллэр.

Анастасия Осипова, Н.Н.Каратаев аатынан Тааһаҕар орто оскуолатын үөрэх чааһыгар дириэктэри солбуйааччы, РФ үөрэҕэриитин бочуоттаах үлэһитэ: «Оҕолорбут сыл аайы этэҥҥэ туттараннар үрдүк, орто үөрэххэ бары киирэллэр. Манна үөрэмиттэрин лаппа туһаналлар. Олоҥхо педагогикатынан үөрэтэрбит инникилэригэр көмөлөһөр».

Норуотун историятын билэр, төрөөбүт дойдуга бэриниилээх буолуу - оҕо инники олоҕор улахан суолаталааҕын билэн манна үөрэх ааһар.