Быйыл өрөспүүбүлүкэ үрдүнэн кыстыкка киириигэ былааннаммыт от барыта кэриэтэ оттоммута

Кыстык саҕаламмыта 3 ыйыгар барда. Хаҥалас улууһун Улахан Аан нэһилиэгин "Бөртө" хаһаайыстыбатыгар уопсайа 838 ынах-сүөһү этэҥҥэ кыстаан турар. Сотору аны икки-үс ыйынан ынах маассабай төрөөһүнэ саҕаланыаҕа. Билигин хаһаайыстыбаҕа номнуо бастакы төрөөһүн баар. Ыанар ынахтар 3 ферманан арахсаллар.

Анна Петрова, "Бөртө" сылгы собуотун ыанньыксыта: «Билиҥҥи туругунан биир тыһаҕас төрөөтө. Бу ыйга өссө икки төрөөрү турар».

Бөртө сылгы собуота Саха сирин биир бөдөҥ бастыҥ үлэлээх хаһаайыстыбалартан биирдэстэрэ. Хас да улахан киэҥ-куоҥ хотоннорунан ынаҕын-сүөһүтүн кыстатар. Икки сыллааҕыта саҥа хотон тутан үлэҕэ киллэрбитэ. Быйыл хаһаайстыбаҕа от былаана ситэрбэтэх буолан, кырдьаҕас ынахтарын идэһэҕэ ыыттылар. Кинилэри эдэр тыһаҕастарынан солбуйдулар.

Ульяна Семёнова, "Бөртө" сылгы собуотун биригэдьиирэ: «От кырыымчыгынан сибээстээн кырдьаҕас ынахтарбытын идэһэҕэ ыыттыбыт 40-ча төбөнү. Ол оннугар эдэр тыһаҕастары киллэрдибит».

Быйыл өрөспүүбүлүкэ үрдүнэн кыстыкка киириигэ былааннаммыт от 90-тан тахса бырыһыана оттоммута. Ол курдук өрөспүүбүлүкэ үрдүнэн 410 тыһыынчаттан тахса от оттонон, былаан 94 бырыһыана туолла. Үгүс улуустарга от хамапаанньата этэҥҥэ түмүктэнэн хаһаайыстыбалар кыстыгы тиийэр оттоох көрсөллөр. Сиилэс, сенаж эмиэ былаанынан бэлэмнэннэ.

Ильдар Семёнов, "Бөртө" сылгы собуотун зоотехнига: «Быйыл оппут 2218 туонна. Күөхпүт 832 туонна, сиилэс 1912 туонна. Оппут кэмчи да буолбутун иһин арыый тиэрдэ сатыахпыт».

Бүгүҥҥү күҥҥэ Саха сирин үрдүнэн 200 тыһыынчаттан тахса ынах-сүөһү, 240 тыһыынчаттантан тахса төбө сылгы , итиэннэ 170 тыһыынчаттан тахса таба баар.

Артём Александров, СӨ тыа хаһаайыстыбатын миниистирэ: «240 тыһ. кэриҥэ сылгы уонна 172 тыһ. курдук таба. Ону таһынан 202 тыһ. хороҕор муостааҕынан кыстыкка киирдибит. Сыл бүтүүтэ ахсаан ааҕытын түмүктүөхпүт. Чипирование үлэтэ бара турар».

Сыллата үгэс быһыытынан, идэһэ кэннэ ынах-сүөһү, сылгы ахсаана аҕыйыыр. Оттон хаһаайыстыбаларга билигин үүттэрин көрдөрүүтэ эбиллэ турар. Мантан кыһын төрүөх элбээн, ыам көрдөрүүтэ өссө үрдүө турдаҕа.