Таһырдьа тымныйан Ожоговай кииҥҥэ үлүйэн киирии түбэлтэтэ элбиир

Өрөспүүбүлүкэтээҕи  2 нүөмэрдээх балыыһа ожоговой киинигэр термическэй, ол эбэтэр уоттан, баһаартан, химическэй сиэтээһин, электротравма, тымныы кэнниттэн эчэйбит дьон киирэн эмтэнэр. Сыллата 800-чэ киһи эмтэниини ааһар. Сүрүннээн итиигэ буспут, уокка сиэппит дьон ахсаана элбэх. Кыһыҥҥы өттүгэр араас төрүөтүнэн үлүйэн киирэр дьон элбиир. Бүгүҥҥү күҥҥэ 8 киһи илиитин, атаҕын үлүтэн эмтэнэ сытар.

Николай Швецов, пациент: «С обморожением, немножко замерзли ноги. Ночью до дома не дошёл».

Хас биирдии киһиэхэ бары өттүнэн толору көмө оҥоһуллар. Киин төгүрүк суукка устата үлэлиир. Медперсонал эмсэҕэлээбит дьоҥҥо бэрт болҕомтоолохтук сыһыаннаһан көрөр-истэр.

Лия Болтунова, медсиэстэрэ: «Бүгүҥҥү турукка 50 койко-миэстэлээхпит. Аҕыс отморожениялаахпыт. Күн аайы бэрэбээскэҕэ сылдьаллар, күн аайы укол, күҥҥэ үстэ аһыыллар».

Үлүйэн киирбиттэр ортолоругар ыарахан үлүйүүлэх суох. Үлүйүү 4 степеҥҥэ арахсар, саамай ыарахан 4-с истиэпэн буолар. Маныаха билигин үлүйүүгэ, даҕаны, итиигэ да буһууга эмтэнии саҥа ньымаларын тутуһан эмтииллэр. Ол курдук туһааннаах тэрилинэн, препараттарынан хааччыллыы үчүгэй.

Семён Алексеев, киин ординатор бырааһа: «Сэбиэскэй кэми кытта кэмнээтэххэ уларыйыы баар. Билигин иһиттэн сылытан эмтиибит. Урут массаж игин этэ. Билигин хаан убатар препараттары туттабыт».

Семен Алексеев киин саамай уоппуттаах бырааһа. Кини 40 тан тахса сыл устата үлэлээн кэллэ. Бу кэм тухары  араас ыарахан туруктаах пациеннары чөлүгэр түһэрэн үлэлии-хамсыы сылдьар.

Семён Алексеев, киин ординатор бырааһа: «Халлаан тымныйда, номнуо оройуоннартан кэлэллэр. Урукку дьыллары кытта тэҥнээтэххэ арыый аҕыйах киһи».

Маныаха ыксаллаах быһыы-майгы тахсар түгэнигэр үлүйбүт киһиэхэ төһө суһаллык сөптөөх бастакы көмө оҥоһуллар да, оччонон эмсэҕэлээбит киһи чөлүгэр түһүүтэ түргэтиир.  Онон тымныы кэмҥэ таһырдьа сылдьарга ичигэс таҥаһы таҥнан сылдьыы ирдэнэр, итиэннэ итирик туруктаах тымныыга барыы-кэлии олоххо кутталлааҕын өйдүүргүтүгэр ыҥыраллар.