Саҥа дьыллааҕы Дьокуускай

Саҥа Дьыл тыына Дьокуускайга. Номнуо болуоссаттар, уулуссалар дьыл саамай алыптаах бырааһынньагар киэргэммиттэр. Тула барыта күлүмүрдэс, оҕо-аймах үөрүүтэ-көтүүтэ.

Саха сирин Саҥа Дьылын биир сүрүн уратыта - муус оҥоһуктар. Тыйыс тымныыга чочуллан тахсыбыт көрүөхтэн ураты оҥоһуктар болуоссаты киэргэтэллэр. 

Киин уулусса сахалыы оһуордаах-мандардаах уоттарынан күлүмнүүр. Бэл салгыҥҥа саҥа дьыл тыына баарга диэри. Оттон Өрөспүүбүлүкэ болуоссата киэркэйиэҕин-киэркэйэн турар. Үрдүгэр чолбон сулус анньыллыбыт саҥа лаглайбыт күөх харыйа иккис сылын дьону үөрдэр. Бу туһунан олохтоохтор үллэстэллэр:

“Харыйаны олус сөбүлээтим. Араас онньуур бөҕөтө. Өҥнөрүн үчүгэйдик талбыттар”.

“Наһаа кыраһыабай. Оҕолорбутугар кэлэн көрдөрө сылдьабыт. Наһаа үөрдүлэр-көттүлэр уоту-күөһүн көрөннөр. Аны Саҥа дьылбытын үөрүүбүтүн кытта кэтэһэбит”.

Дойду үрдүнэн Саха сиригэр аан бастакы Саҥа дьыллааҕы харыйалар сандаараллар. Онон хайа улуус хайдах харыйалааҕын дьон-сэргэ сэҥээрэр. Холобур, быйыл баай уоттаах-күөстээх Миирининэй дьуолката тэҥнээҕин булбата. Социальнай ситим устун күүскэ тарҕанна, дьон биһирэбилин ылла.

“Оттон саамай мааны харыйа Өрөспүүбүлүкэ болуоссатыгар. Бу кыраһаабыссаны кытта хаартыскаҕа түспэтэх аҕыйах буолуохтаах. Билигин биһиги операторбын кытта эмиэ түһүөхпүт”,- Мария Дмитриева, корреспондент.

Бу харыйа болуоссат саҥардыллыбытын кэннэ быйыл иккис сылын турар. Үрдүгэ 20 миэтэрэ, ыйааһына 3 туоннаттан тахса. Сүрүн уратыта тыыннаах харыйаҕа олус маарыҥныыр. 

"Салгыы биһиги сынньалаҥ уонна култуура пааркатыгар кэллибит. Манна бэстэри дьэрэкээн уоттарынан киэргэппиттэрэ остуоруйа алыптаах ойууругар кубулуйбут. Итиэннэ Дьокуускай биир саамай Саҥа дьыллааҕы тыыны биэрэр миэстэ буолбут", - Мария Дмитриева, корреспондент.

Оттон пааркаҕа киирээти кытта саҥа дьыллааҕы харыйа лаглайан турар. Үрдэл сиргэ турар буолан ыраахтан киэркэйэн көстөр. Тула бэстэри кытта холбоон ураты көстүүнү бэлэхтииллэр.

Мария Егорова: "Наһаа үчүгэй буолбут. Бастакытын маннык кэрэ буолбут курдук. Барыта уот-күөс, кып-кыраһыабай дьуолка, кып-кыраһыабай пааркабытыгар үөрэ-дуоһуйа сылдьабыт".

Дьыл саамай күүтүүлээх күнэ үүнэрэ аҕыйах хонук хаалла. Хас хардыы аайы куорат тупсан-симэнэн иһэр. Болуосаттары таһынан күннэтэ тэрилтэлэр киэркэйэллэр.