Хатаһынан туорааһыҥҥа саппаас балаһалары оҥоруу тэтимнээхтик барар

Бу Хатас-Павловскай хайысханан өрүс суола. Манна киириигэ шлагбаум турар. Билигин  куттал суох буолуутун хааччыйар инниттэн суукканы эргиччи видео кэтээн көрүү уонна ыйааһын хонтуруола олохтонно. Туорааһыынан айанныыр дьоҥҥо көҥүллэммит ыйааһыннаах массыыналарынан эрэ сылдьалларыгар уонна массыыналар икки ардыларыгар 70 миэтэрэни тутуһуу булгуччулаахтык итиэннэ суол бэлиэлэрин көрөн быраабыланы тутуһалларыгар ыҥыраллар.

Туорааһыҥҥа саппаас суолу оҥоруу үлэтэ көхтөөхтүк бара турар. Ол курдук бэдэрээттээх тэрилтэлэр икки өттүттэн уу ыһан, муус оҥорон тэҥнииллэр. Үлэ күннэри-түүннэри тиһигин быспакка салҕанар.

Илья Антонов, суол оҥорор тэрилтэ үлэһитэ: "Суолбутун күн аайы “үүннэрэбит”. Ол аата хас күн ахсын 10-15 сантымыатыры кутан халыҥатан иһэбит. 1-2 балаһа арыллыбыта, бу 3-4 балаһа үлэтэ ахсынньы 10 күнүн кэннэ түмүктэниэ. Бу балаһалар саппаас буолаллар".

Дьокуускай эргин өрүскэ муус халыҥа барытыгар биир буолбатах. Онон халыҥ да муус тутула уларыйан массыына ыйааһынын уйумуон сөп куттала син биир баар. Өрүс мууһа 50 см саҕалаан 80 см диэри халыҥ, онон 5 туоннаҕа диэри ыйааһыннаах транспорт туоруура көҥүллэнэр. Салгыы муус халыҥыырынан көрөн үрдэтэн иһэллэрэ былааннанар. Бэлиэтээн эттэххэ, Саха сирин үрдүнэн уопсайа 16 тыһыынча килэмиэтир кыһыҥҥы суол баар, ол курдук 47 өрүс уҥуор туорааһын үлэлиэхтээх.Онтон бүгүҥҥү күҥҥэ 12% аһыллан, сүрүннээн хоту улуустарга, айан-сырыы тэриллэр.

Семён Коркин, СӨ тырааныспар миниистирин солбуйааччы: "Кыһалҕалаах суол учаастактара бааллар жиэн этиэххэ сөп. Холобур, Абый улууһугар Индигир өрүс туруута быйыл уратылаах буолан сорох сирдэринэн тиэхиньикэ сатаан үлэлээбэт. Манна илиинэн үлэни ыытабыт. Онтон атын өрүстэргэ үлэ былаан быһыытынан барар".

Оттон Дьокуускай-Аллараа Бэстээх хайысханан кыһыҥҥы суол ахсынньы бүтүүтэ, тохсунньу саҥатыгар арыллара күүтүллэр. Бу хайысханан уларыйыы үлэлэрэ бараллар. 

"Билигин ахсынньы саҥата улахан тымныылар түһэ иликтэр. Ол курдук Дьокуускайга билигин 30 тахса эрэ турар. Оттон кэлэр нэдиэлэттэн үгүс улуустарга тымныы түһэрэ күүтүллэр", - Татьяна Николаева, корреспондент.