Тааһаҕар Бүлүү улууһун биир тэтимнээхтик сайдар нэһилиэгэ
Саҥа оҕо былаһааккалара, сквердэр, фельдшер пууна, үөрэх кыһата, култуура дыбарыаһа бу барыта аҕыйах сыл иһигэр Тааһаҕардарга баар буолбута. Өрөспүүбүлүкэ, судаарыстыба ыытар бырагыраамаларыгар нэһилиэк көхтөөхтүк кыттан, сайдар кэскили тобулбута.
5 сыллааҕыта нэһилиэк хаба ортотугар 100 миэстэлээх, киэҥ-куоҥ, аныгы ирдэбилгэ толору эппиэтиир, сахалыы тыыннаах үөрэх кыһата дьэндэйбитэ. Аанын тэлэччи аһан, Тааһаҕар оҕолоро киин куораттартан туох да уратыта суох оскуолаҕа үөрэнэ киирбиттэрэ. Үөрэх хаачыстыбата, бастатан туран, үрдээбитэ.
Анастасия Осипова, Н.Н.Каратаев аатынан Тааһаҕар орто оскуолатын үөрэх чааһыгар дириэктэри солбуйааччы, РФ үөрэҕэриитин бочуоттаах үлэһитэ: "Оҕолорбут сыл аайы түмүктүүр эксээмэннэри этэҥҥэ туттаран, үрдүк, орто үөрэххэ 100% киирэллэр. Киирбит оҕолорбут ситиһиилээхтик үөрэнэн, идэ ылан дойдуларыгар көмө буолаллар".
Оскуола үлэҕэ киирбитин икки сылын кэнниттэн, аны нэһилиэккэ биир баараҕай тутуу - култуура дыбарыаһа үлэҕэ киирэр. Манна билигин 20-чэ холбоһук, түмсүү үлэлиир. Аныгы олох тэтиминэн "ЭкстраСинема" киинэ тыйаатыра нэһилиэк олоҕун сэргэхситэр.
Клавдия Петрова, Эйгэ" норуот айымньытын дьиэтин дириэктэрэ, СӨ култууратын үтүөлээх үлэһитэ: "Биһиги өрөспүүбүлүкэҕэ көстөр бары саха киинэлэрин киин куораты кытта тэҥҥэ биир күн көрөбүт".
Тыа хаһаайыстыбатын хайысхатынан эдэрдэр үлэлээн эрэллэрин нэһилиэк аҕа баһылыга Семен Каратаев үөрэ кэпсиир. Социальнай хантараак бырагырааманан олохтоох уолаттар хаһаайыстыба тэринэллэригэр кыах үөскээбит.
Семён Каратаев,: "Эдэр уолаттар социальнай хантараак ыланнар хотон тутуннулар. Аныгы технологиянан туттаннар сүөһүлэрин үчүчгэй баҕайытык көрөн-истэн саҕалаатылар ".
Маныаха олорор усулуобуйаны тупсарыыга эмиэ күүстээх үлэ барар. Билигин Тааһаҕар нэһилиэгэ сүүс быраһыан гаас ситимигэр, сайыҥҥы кэмҥэ уу ситимигэр холбонон тураллар. Итиэннэ "Ыраас уу" бырагыраама нэһилиэнньэни дьэҥкир уунан алтынньы ыйга диэри хааччыйар.
