Лөкөчөөн сыыра

Марина Татаринова үһүс сылын үрүҥ илгэни оҥорон таһаарар сыахха үлэлии-хамсыы сылдьар. Кини кичэллээх сыһыанынан Лөкөөчөн аатырбыт сыыра бэлэм буолар. Бородууксуйа бүтэһиктээх түһүмэҕэр диэри  барыта илии үлэтэ.

Марина Татаринова, сыах үлэһитэ: "Киэбин ыллын диэн эргитэбит. Онон киэһэ кэлэн эргитэбит. Онтон сарсыарда туустаах ууга угабыт. Онно 8 чаас устата сытар. Ол кэннэ холодильникка 14 күн куурар".

Качотта, Моцарелла, Рикотто  бу сыахха аатырбыт сыыр суортарын нэһилиэнньэ сииригэр оҥорон таһаараллар. Бу сыалга анаан 2013 сыллаахха оборуудабанньа атыылаһыллан, туруоруллан, биир сылынан сыах үлэтин саҕалаабыта. Тутатына Лөкөчөөн сыыра дьон болҕомтотун  таппыта.

Марианна Харлампьева, сыах үлэһитэ: "Биһиги бастаан манна 120 лиитэрэ ынах үүтүн кутабыт. Итиэннэ анал сыыр оҥорор бырагырааманы холбуубут".

Бу курдук киччэллээх, ымпыктаах түһүмэхтэри ааһан, сыыр "сойор", уута түһэр. Эргитиллэр. Онтон дьэ анал сөрүүн температуралаах хоско киирэр.

Марина Татаринова, сыах үлэһитэ: "Икки нэдиэлэ устата сыталлар. Сарсыарда аайы эргитэлиибит. Ол кэннэ буоскаланаллар".

Дьиҥнээх сыыр оҥоһуллуутун технологиятынан икки нэдиэлэнэн эрэ бородууксуйа толору сүмэтин ылан бэлэм буолар.

"Лөкөчөөн сыырын эрдэ сиэн көрө илигим. Онтон билигин ыалдьыт быһыытынан амсайан көрүөм. Олус минньигэс эбит, Италия аатырбыт сыырдарыттан уратыта суох", - Анастасия Добрянцева, корреспондент.

Маны таһынан "Туйгун Астар" сыыртан ураты суорат, йогурт бородууксуйатын оҥорон таһаараллар. Дьон эмиэ хамаҕатык атыылаһар.

Галина Малышева, сыах үлэһитэ: "Клубника, персик амтаннаах йогуртары оҥорор буолбуппут. Чохоон, күөрчэх оҥоһуллар. Бу бородууксуйалар кыһыннары сайыннары баар буоллалар".

2014 сыллаахтан Лөкөчөөн сыыра өрөспүүбүлүкэ үгүс олохтоохторун биһирэбилин ылла. Тэрилтэ салгыы былаана киэҥ. Үүнэр-сайдар тосхолу тутуһар.