Дьокуускайга "Спортивнай" түөлбэҕэ уһуйаан арылынна

Саҥа "Спортивнай" диэн түөлбэҕэ үөрүүлээх историяҕа хаалар түгэн - бастакы уһуйаан арыллыыта. Сахалыы сиэринэн-туомунан саҥа тутууга киириэх иннинэ алгыс түһэриллэр, аал уот оттуллар. Дьэ, ол кэннэ кыһыл лиэнтэ быһыллар, кырачааннар аан маҥнайгытын саҥа уһуйааннарын боруогун атыллыыллар. 

Бэлиэ тэрээһиҥҥэ өрөспүүбүлүкэ Ил Дархана Айсен Николаев кыттыыны ылла. Кини саҥа түөлбэ тутуутугар социальнай эбийиэктэри маҥнай саҕалааһыҥҥа болҕомто уурулларын ыйда. Үөрүүлээх тэрээһин сүрүн кыттыылаахтара, биллэн турар, кырачааннар. Кинилэр кэлбит ыалдьыттарга ырыа, хоһоон эгэлгэтин бэлэхтээтилэр.

Саҥа уһуйаан киэҥ-куоҥ 3 мэндиэмэннээх, уопсайа 3 тыһыынчаттан тахса кыбыдыраатынай миэтэрэ иэннээх. Номнуо үлэлээн саҕалаабыт. Кырачааннар бастакы күннэрин сылдьаллар, уһуйааччыларын, детсадтарын кытта билсэллэр.

Елизавета Гуляева, төрөппүт: "Барыта саҥа, ыраас сырдык. Оҕом астынна аҕай. 3 мэндиэмэннээх, спортивнай саалалара олус үчүгэй, музыкальнай саалалара туспа эбит. Утуйар сирдэрэ эмиэ туспа. Олус кэрэ уһуйаан эбит".

Кырдьык да, манна барыта аныгылыы тупсаҕай оҥоһуулаах, бырайыактаах. Эрдэ уһуйаан турбут сиригэр "Көһөрүү" бырагыраамаҕа киирбит мас дьиэлэр турбуттара. Оттон билигин манна кэчнээри ыччат сайдар киинэ.

"Уһуйаан уопсайа 12 бөлөхтөөх. Манна оҕолор икки тылынан хайдан иитиллэллэр. Кырачаанар эт-хаан өттүнэн сайдалларыгар толору усулуобуйа олохтоммут. Ол курдук бу киэҥ-куоҥ спорт саалата. Манна эти-хааны чэбдигирдэр тэрил арааһа. Оттон уһуйаан сүрүн уратыта – туустаах хос", - Мария Дмитриева, корреспондент.

Кэмпэндээйи эмтээх тууһун салгынынан оҕолор тыынар уорганнарын чэбдигирдиэхтэрэ. Манна оҕолорго эрэ буолбакка үлэһиттэргэ эмиэ үлэ табыгастаах усулуобуйата олохтоммут.

Лена Наумова, 43№-дээх "Улыбка" уһуйаан иитээччитэ: "Хас биирдии иитээччи бөлөҕөр аныгы технологиянан хааччыллыы баар. Ол курдук үлэлиир остуолугар принтер, саҥа программалаах улахан компьютер, сенсорнай экраннар бааллар, телевизордар бааллар. Үлэлииргэ наһаа үчүчгэй усулуобуйа олохтоммут". 

“Спортивнай” түөлбэҕэ тутуу билигин тэтимнээхтик барар. Оттон өрөспүүбүлүкэҕэ билигин 11 уһуйаан тутулла сылдьар.

Нюргуна Соколова, СӨ үөрэх уонна билим миниистирэ: "Хомойуох иһин, кырачаан оҕолорбутугар уһуйааҥҥа киириигэ уочарат баар. Бу маннык дьиэлэр үлэҕэ киирэннэр уочарыт аччаталлар. “Ыччат уонна оҕо” диэн национальнай бырайыак чэрчитинэн икки уһуйаан Дьокуускайга тутулла сылдьар ".

Онтон эһиилги сылга киин куоракка өссө икки уһуйаан тутуута саҕаланыа.