Ил Түмэн дьокутааттара кэлэр сыллааҕы бүддьүөт барылын иккис уонна бүтэһик ааҕыыга ылыннылар

Эһиилги уонна онтон кэлэр икки сыл бүддьүөтэ бигэргэннэ. Үп сүрүн докумуонун дьүүлгэ таһаарыах иннинэ күүстээх үлэ барда. Ол курдук 700 тахса көннөрүүнү норуот депутаттара уонна бырабыылатыстыба оҥордо. Барыта эриэ-дэхси буолбатах. Уустук кэмҥэ үбү тыырыы эмиэ уустуктук барар.

Юрий Николаев, Ил Түмэн Бэрэссэдээтэлин солбуйааччы: «Өрөспүүбүлүкэ иэһин улаатыннаран туран син биир тыа хаһаайыстыбатыгар тиийбэт 2 млрд эбии көрдүбүт. Дохуоппут 337 млрд тахса буоллаҕына, оросхуоппут 349 млрд ол аата биһиги дэписсииппит 12 млрд тахса».

Ол аата эһиил үбү туһаныы хонтуруола хас да бүк күүһүрүө. Итини сэргэ хомунаалынай төлөбүр субсидиятыгар эбии 4 млдр бэрилиннэ. Холобур, ааспыт сылга олох-дьаһах хомунаалынай хаһаайыстыбатын төлөбүрүгэр 35 млрд тыырыллыбыта, оттон быйылгы сайаапка 53 миллиард. Онон кэлэр сылга өссө уонтан тахса млдр угар сорук турар. Өрөспүүбүлүкэ үбүн тыырыы федеральнай өйөбүлтэн быһаччы тутулуктаах.

Галина Данчикова, РФ Судаарыстыбаннай Дуума депутата: «Если говорить о нашей республике, то мы с вами на трехлетку получаем 330 млрд рублей, если говорить о 2026 году, это получается 111 млрд рублей, это субсидии, субвенции и дотации на выравнивание бюджетной обеспеченности».

Итини сэргэ федеральнай үптэн национальнай бырайыак чэрчитинэн Өлүөнэни туоруур муоста тутуутугар кэлэр 3 сылга 41 миллиард тыырыллыбыт. Оттон сыллааҕы үбү тыырыыга социальнай хайысханы ханнык да түһэҥҥэ сарбыйбат сорук турар. Онон бу эйгэҕэ бүддьүөт оннунан хаалла.

Алексей Еремеев, Ил Түмэн Бэрэссэдээтэлэ: «Балай да ыарахан бүддьүөт. Биһи баҕарбыппытынан туох баар наадаларбытыгар уонна хайысхаларбытыгар сөптөөх үбү харчыны көрдүбүт диэн улаханнык астыммаппыт да буоллар. Бастатан туран хамнаска, социальнай төлөбүр өттүлэригэр кыах баарынан үбү көрө сатаатыбыт».

Кэлэр сылга үбү сөптөөхтүк туһаныыга хонтуруол күүһүрүө, итиэннэ тыырыллыбыт харчы тиийэр болдьоҕун кылгыа. Бу туһунан үп сүрүн докумуонун ылыныыга чопчу сурулунна.