Саха сиригэр Олоҥхо күнүн киэн далааһыннаахтык бэлиэтээтибит

Олоҥхо күнүн көрсө төрүт үгэспитин илдьэ сылдьааччыларга, үйэтитиигэ үлэлэһэр, ыччаты сайыннарыыга, уһуйууга кылааттарын иһин - олоҥхоһуттарга, оһуохай этээччилэргэ, тимир уустарыгар уонна норуот маастардарыгар Ил Дархан анал стипендияларын туттардылар. 

Үөһээ Бүлүү улууһуттан сылдьар Айталина Мойтохонова -  Дархан этээччи, уһуйааччы. Кини оһуохайдаабыта 37 сыл буолбут, онтон оҕолору оһуохайга уһуйбута 30-ча сыл.  Бу бэлиэ күн анал стипендияны туппутум тус бэйэбэр улахан суолталаах уонна эппиэтнэстээх диэн этэр. Бу үлэбит түмүгэ буолар диэн үөрэ кэпсиир.

Айталина Мойтохонова, Ил Дархан анал стипендиятын хаһаайына: «Ил Дархан маннык стипендия анаабыта саха дьонун сайдыытыгар улахан хардыы дии саныыбын. Биһи олоҥхолоох буоламмыт сахабыт. Олоҥхо тыла уус-уран баайа биһиэхэ баар буолан омук быһыытынан эстиэхпит суоҕа».

Чурапчы улууһуттан сылдьар Валентина Дьячковская оҕолорго оһуохайы, тойугу, чабырҕаҕы уһуйбута ыраатта. Төрүт үгэһи удьуордуур ыччаты иитэн-үөрэтэн,  үүннэрэн эрэбит диэн үөрэ кэпсиир. 

Валентина Дьячковская, Ил Дархан анал стипендиятын хаһаайына: «Оҕолору уһуйааччы буоларым быһыытынан итиннэ өссө ордук астынным. Салгыы маннык үлэлэһиэхпит. Хайаатар даҕаны олоҥхобут, оһуохайбыт, чабырҕахпыт, тойукпут, ииспит саха буолан сандаарыаҕын, киһи буолан килбэйиэҕин диэн махтанабын».

Түөрт сыл иһигэр анал стипендияны 107 төрүт култуура үгэстэрин илдьэ сылдьар ытык дьоммут тутта. Ил Дархан Айсен Николаев Олоҥхо күнүнэн эҕэрдэлээн туран, бу 20 сыл устата ыытыллыбыт үлэ түмүгэ үрдүк көрдөрүүлээҕин бэлиэтээн туран, үлэ ситимнээхтик салҕанарыгар, Олонхо үһүс 10 сыла саҕаланарын туһунан иһитиннэрдэ.

Сергей Местников, СӨ бырабыытылыстыба бэрэссэдээтэлин солбуйааччы: «Ил Дархан бүгүн саҥа ыйаах баттаата. Ол курдук, олоҥхону үһүс 10 сылын биллэрэр туһунан дөкүмүөн ылыллан. Салҕыы олоҥхону үйэтитиигэ, төрүт култуурабытын, үгэспитин, ийэ тылбытын үүнэр көлүөнэҕэ тириэрдиигэ биир ситимнээх судаарыстыбыннай политика ыытылларын бэлиэтиибит».

Саха сиригэр Олоҥхону үйэтэтиигэ, киэҥ араҥаҕа тарҕатар соруктаах үгэс быһыытынан Олоҥхо декадата саҕаланна. Декада арыллыытыгар сыл түмүгүнэн бастыҥ олоҥхоһуттары чиэстээтилэр.

Олоҥхо декадата ахсынньы 15 күнүгэр диэри ыытыллыаҕа. Декада чэрчитинэн научнай конференциялар, төгүрүк остуоллар, айымнньыылаах киэһэлэр, күрэхтэр ыытыллыахтара, ордук болҕомто оҕолорго, эдэр ыччакка ууруллуоҕа.