Дьокуускайга саха тылын уонна литературатын, култууратын учуууталларын 3-с сийиэһэ ыытылла турар

Төрөөбүт тылбыт билиҥҥи туруга уонна кэскилэ. Сийиэс дэлэгээттэрэ төрүт тылы билиҥҥи кэмҥэ сайыннарыы тула үстүү сыл буола буола түмсэллэр. Быйылгы тэрээһиҥҥэ 500 кэриҥэ учуутал, ону таһынан тыл үөрэхтээхтэрэ, саха тылын туһугар ыалдьааччылар, салалта кыттыыны ылар. Манна хас биирдии дэлэгээт бэйэтэ тус санаалаах, туруорсуулаах.

Ньургустаана Титова, Хаҥалас улууһун Ой орто оскуолатын саха тылын учуутала, сийиэс дэлэгээтэ: «Билигин федеральнай стандарт киирбитэ, онон алын кылаастарбытыгар чааспыт аҕыйаабыта. Кыра оҕо эрдэҕиттэн уһуйуллуохтаах буоллаҕа. Онон чаастар уруккуларыныы хаалалларын курдук баҕалаахпын».

Оҕоҕо төрөөбүт тылын олох кыра сааһыттан иҥэн-тоҥон иҥэриини үгүс учуутал туруорсар. Холобур,  күн бүгүн 451 уһуйаан саха тылын үөрэтэр. Маныаха төрөөбүт тылы сайыннарыыга төрөппүт оруола үрдээтэҕинэ үлэ өссө таһаарыылаах буолуоҕун уопуттаах учууталлар ыйаллар.

Юрий Афанасьев, Үөһээ Бүлүү улууһун Далыр нэһилиэгин орто оскуолатын саха тылын учуутала, сийиэс дэлэгээтэ: «Төрөөбүт тылынан сайыннарыы, ордук төрөппүттэри кытта үлэ барыан наада».

Үгүс дэлэгээт бэлиэтииринэн, саха тылын билии таһыма араастаһар. Онон манна сөп түбэһиннэрэн учебниктар, эбии үөрэхтээһин кинигэлэрэ оҥоһуллаллар. Саҥа учебниктар федеральнай үөрэхтээһин биир кэлим ситимэр киирэллэрин ситиһиллиннэ.

Феодосия Габышева, СӨ наука Академиятын төрөөбүт тылы чинчийэр, харыстыыр уонна сайыннарар киинин салайааччыта: «Билигин бу үлэ күүскэ бара турар. Учууталларга өйөбүл баар буолуохтаах».

Ааспыт сийиэскэ 2030 сылга диэри үлэ былаана тиһиллибит кэнсиэпсийэ ылыллыбыта.  Бу барылынан үлэ ыытыллар. Бастатан туран, сүрүн болҕомто үөрэхтээһин хаачыстыбатын кэтээн көрүүгэ ууруллар.  

Нюргуна Соколова, СӨ үөрэх уонна билим миниистирэ: «Арассыыйа таһымнаах бэрэбиркэлиир үлэлэр курдук биһиги өрөспүүбүлүкэтээҕи кэтээн көрөөһүн үлэтин эмиэ ыытар буолуохпут».

Сийиэс икки күн утстата салҕанар. Сүрүн сорук билим уонна педагогика күүстэрин түмэн үөрэтии хаачыстыбатын үрдэтии буолар.