Билигин Өрөспүүбүлүкэ бары оройуоннарыгар оттук кэмин үгэнэ

Айылҕа күөх төлөнүн оператора Феодосия Поскачина билигин үлэтин саамай үгэнэ. 12 чаас тохтоло суох кини нэһилиэк сүрүн эбийиэгин көрөр- истэр. Саҥа муодулунай хочуолунай буолан манна барыта тарбаҕынан, илии иминэн баттаан үлэ хаамыыта барар диэн исписэлиис кэпсиир.

Феодосия Поскачина, газооператор: «Саамай сүрүммүт – щитовой. Туох эмит буоллаҕына барытын манна көрдөрөр».

Биллэн туран маннык эбийиэккэ чахчы туох баҕарар болуон сөп, онон тустаах хочуолунайга түөрт газооператор үлэлиир-хамсыыр. Бу Тааһаҕар производственнай учаастага Саха Өрөспүүбүлүкэтин олох-дьаһах хоммунаалынай хаһаайыстыбатын филиала буолар. Ититии ситимэ толору күөх төлөнүнэн - гааһынан барар.   

Родион Осипов, Тааһаҕар производственнай учаастагын маастара: «Быйылгы сезоҥҥа харчы кырыымчыгын да иһин филиал администрацията барытын сөргүтэн оҥорон кыстыкка бэлэмнээн киллэрдэ. Этэҥҥэ туоруохпут диэн эрэллээхпит».

Уопсайынан нэһилиэккэ олох-дьаһах хомуунаалынай өттүгэр улахан болҕомто ууруллар. Ититэр ситим саҥа, аныгы буоллаҕына, Тааһаҕардарга сайынын уу тохтоло суох кэлэр, маныаха ыраас уу бырайыак нэһилиэнньэ олоҕун усулуобуйатын тупсарар.

Семён Каратаев, "Тааһаҕар" МТ баһылыга: «Ыраас уулаахпыт. Кыһын дьон мууһунан олорор эбит буоллаҕына, биһи муус устар ыйтан саҕалаан алтынньы бүтүөр дылы ыраас ууну дьоҥҥо биэрэбит. Онтон  дьон муус ылла даҕаны аччатабыт экономия быһыытанан».

Манна даҕатан эттэххэ, билигин Өрөспүүбүлүкэҕэ оттук кэмин үгэнэ. Сорох улуустарга балаһыанньа араастаһа турар. Ол эрэн барыта хонтуруолга турар.