Саха сиригэр кыстык кэмэ

Бүлүү Лөкөчөөнүгэр үөрүүлээх түгэн тосхойдо 150 хороҕор муостаах биирдэ батар, аныгы ирдэбилгэ толору эппиэттиир хотон улэҕэ киирдэ. Нэһилиэк биир бөдөҥ Харлампьевтар бааһынай хаһаайыстыбалара 2011 сыллаахтан бу хайысхаҕа ымпыктаахтык ылсан үлэлээн, билигин бэртээхэй уораҕайы тутан үлэҕэ киллэрдилэр.

Марианна Харлампьева, хаһаайыстыба үлэһитэ: «Дьиэ кэргэн грааныгар киирэн хотон тутуутугар ылбыта. 2022 сыллаахтан саҕалаабыттара, уонна 2025 сылга үлэҕэ киирдэ».

Дьиэ кэргэн хаһаайыстыбатын тутаах үлэһитэ Марианна Харлампьева кэпсииринэн билигин тустаах хотоҥҥо 122 ынах кыстыгы этэҥҥэ туораары тураллар, мантан 80-на төрүүр хороҕордор. Бу бэрт соторутааҕыта номнуо бастакы төрүөх кэллэ. Сэтинньи ыйга ньирэй күн сирин көрөн үлэһиттэр үөрүүлэрэ баһаам.

Сардаана Михайлова, хаһаайыстыба үлэһитэ: «Бастакытын булаат да бэйэбэр ыллым. Ол иһин аһата сылдьабыт. 3 күнүнэн киинэ номнуо түспүт, үчүгэй доруобай. Иккис күнүгэр сүүрбүтүнэн барда».

Саҥа уораҕайга киирээти кытары, ньирэй күн сирин көрөн, хаһаайыстыба кыстыкка өрө көтөҕүүлээхтик киирдэ. Маныаха саҥа хотоҥҥо барыта автоматизированнай оборуудабанньалары туруоран, үлэ хаамыыта түргэн. Хаһаайыстыба ыанньыксыта  Анисия Григорьевна анаан-минээн манна Таатта улууһуттан үлэлии кэлбит. Кини үлэлииргэ усулуобуйа тупса турарын тоһоҕолоон этэр.

Анисия Вырдылина, хаһаайыстыба үлэһитэ: «Быйыл молокопровод киллэрбиттэрэ. Холбоон баран кнопка эрэ баттыыгын. Наһаа үчүгэй».

Билигин хаһаайыстыба биир ынахатан 4-6 лиитирэ үрүҥ илгэни ыла олорор. Манна даҕатан эттэххэ, тустаах хаһаайыстыба отун былаанын толорон, сүөһү эбии аһылыгынан толору хааччыллан кыстыгы этэҥҥэ туоруур соруктаах.