Улахан хаар кэлэн куорат үрүҥ суорҕанынан бүрүннэ. Тохтообокко түһэр хаар хомунаалынай сулууспа уонна суол-иис үлэһиттэригэр түбүктэрин эптэ. Быыстала суох улахан тиэхиникэ куорат уулуссаларын хаартан ыраастыыр, сүрүн болҕомтону айан-сырыы элбэх сирдэригэр уураллар. Маныаха дьон сылдьар сирдэрин, тротуардры ыраастааһын эмиэ тохтоло суох барар.

Маныаха тиэхиникэ ахсаана күннэтэ эбиллэр. Ол курдук сэрэдэ күн хаар наһаа мунньуллубутунан 60 тиэхиникэ таһаарар соруктаахтар. Хаары ыраастааһын бары уулуссаларга, тохтобулларга, уопсастыбыннай сирдэргэ, болуоссаттарга барар. Бу иннинэ ааспыт нэдиэлэ түмүгүнэн балтараа тыһыынча кууб хаары тиэйбит эбит буоллахтарына, билигин бу сыыппара хас да бүк улаатта.

Александр Павлов, суол тэрилтэтин салайааччытын көмөлөһөөччүтэ: «В связи с изменившейся погодой, работа у нас увеличилась. Если в прошлый раз у нас было примерно 1600 м3 снега на полигоне, то сейчас уже 7381 м3 снега».

Суол-иис үлэһиттэрин тэҥэ хаары кытта охсуһууну хас биирдии уокурук көхтөөхтүк ыытар. Маныаха муниципальнай дворниктар өҥөлөрө улахан.

Губин уокуругун биир тутаах үлэһитэ Афанасий Тарабукин дворнигынан үлэлээбитэ 10-тан тахса сыл буолла. Кыһыннары-сайыннары күннэтэ куорат ыраас буоларын туһугар үлэлиир-хамсыыр. Афанасий Семенович кыһынын лаппаакы, күрдьэх, сайынын сиппиир, куул тутуурдаах уокуругун уопсастыбыннай сирдэрин бөхтөн-сыыстан ыраастыыр.

Афанасий Тарабукин, Губинскай уокурук тиэргэни ыраастааччыта: «Сарсыарда муосталары ыраастаабыппыт, онтон светофорга дьон туоруур сирин күрдьүбүппүт. Онтон эбиэттэн киэһээ искибиэрдэри».

Маннык хас биирдии уокурук дворниктара бэйэлэрин территорияларын көрөллөр-истэллэр, ыраастыыллар. Оҕо былаһааккаларын бөҕүн эмиэ хомуйаллар. Салгыы бу искибиэр кэннэ атын сирдэригэр тиийэн эмиэ хаары кытта үлэлииллэр.

Өлгөм хаартан сылтаан суол-иискэ айан-сырыы хааччахтанар түгэнэ элбээтэ.Чуолаан автобустар сырыылара бытааран көһүтүү бириэмэтин уһатта. Маны тэҥэ сатыы да дьоҥҥо хаар хаамарга эмиэ туспа харгыстары үөскэттэ. Хаар түһүүтэ бүгүн, сарсын салҕанара күүтүллэр.