Киин куоракка карантин түмүктэнэн оҕолор оскуолаларыгар бардылар

Киин куоракка карантин түмүктэнэн оҕолор оскуолаларыгар бардылар.  Ол эрээри кириип, ОРВИ ыарыыларын көрдөрүүтэ хонтуруолга сылдьар. Маныаха балыыһаларга тымныйан ыалдьар дьон ахсаана аҕыйаҕа суох. Күҥҥэ ортотунан 30-40 диэри киһи кэлэн көрдөрүнэр. 3№-дээх поликлиникаҕа куорат соҕуруу өттө бүтүннүү кэриэтэ сылдьар.

Ульяна Афанасьева, Дьокуускайдааҕы 3№-дээх балыыһа терапевт бырааһа: «Ыарыһахтарбыт үксэ кирииптээн кэлэллэр. Кириип А экспресс тестынан быһаарабыт».

Оттон Киров аатынан уулуссаҕа турар өрөспүүбүлүкэтээҕи үһүс нүөмэрдээх балыыһаҕа күннэтэ эмиэ уонунан киһи ыалдьан кэлэр, оттон үрдүк температуралаах дьиэтигэр бырааһы ыҥыттарар. Сүрүннээн ОРВИ, кириип ыарыыта тарҕаммыт.

Савелий Неустроев, СӨ 3№ балыыһатын фельдшера: «15-20 киһи көрдөрүнэ кэлэр. 10-15 курдук вызов кэлэр».

Роспотребнадзор кэтээн көрүүтүнэн бүтэһик нэдиэлэҕэ киин куоракка оскуола оҕолорун ыалдьыыта аччаан турар, онон хааччах тэрээһин бэнидьиэнньиктэн тохтоото. 

Ольга Сависова, Роспотребнадзор СӨ салалтатын эпидемиологическай кэтээн көрүүгэ салаатын эксперт-исписэлииһэ: «46 нэдиэлэ түмүгүнэн Дьокуускай куорат үрдүнэн кириип уонна тумуу ыарыытын таһыма оскуола оҕолоругар түһэн турар. Ол курдук, санитарно-противоэпидемологическэй хамыыһыйа быһаарыытынан карантин сэтинньи 17 күнүттэн тохтоото. Үөрэх тэрилтэлэригэр сарсыардааҥҥы фильтр, тус гигиенаны тутуһуу, дезинфекционнай эрэһиими күүһүрдүү буола туруохтаах».

Дьокуускайга оскуола саастаах оҕолор ортолоругар ыарыы аҕыйаабыт эбит буоллаҕына, үгүс улуустарга ыарыы көрдөрүүтэ биллэрдик үрдээн эрэр. Ол курдук Хаҥалас улууһугар 3 оскуола уонна биирдиилээн кылаастар карантиҥҥа олороллор.

Дмитрий Сакердонов, Хаҥалас улууһун үөрэҕириигэ салалтатын сүрүн исписэлииһэ: «Бүгүҥҥү күҥҥэ Хаҥалас улууһун үрдүнэн Мохсоҕоллоох, Тиит-Эбэ оскуолалара карантиҥҥа сабыллан тураллар. Ону таһынан 7 оскуола кылааһынан уонна 4 оҕо уһуйаана быһаҕастык сабыллан үлэлииллэр».

Специэлиистэр бэлиэтииллэринэн, ОРВИ, грипп ыарыыттан харыстаныыга саамай көдьүүстээҕинэн быһыы ылыы буолар. Хотугулуу-Илиҥҥи федеральнай университет балыыһатыгар устудьуоннары эрэ буолбакка, олорор сирдэринэн сыһыаннаахтарга барыларыгар кириип утары прививка туруораллар.

Анна Егорова, ХИФУ клиникатын медсиэстэрэтэ: «Биһиги устудьуоннарга эрэ буолбакка нэһилиэнньэҕэ, үлэһиттэргэ эмиэ туруорабыт».

Маныаха дьаҥнааһыны утары быһыыны туруоруу түмүктэнэн эрэр, ол курдук вакцинация поликлиникаларга ахсынньы ыйга диэри ыытыллыаҕа.