Өлүөнэ өрүһү уоран туоруур массыыналары кэтиир холбоһуктаах рейдэлэр күүһүрдүлэр

Уу эбийиэктэригэр куттала суох буолууну хааччыйыыга эппиэттиир бары биэдэмистибэлэр холбоһуктаах рейдэҕэ туруналлар. Салгын олбохтоох суудунанан эбэ устун кэрийэ сылдьан массыналары кэтиибит. Өр өтөр буолбат 3 көлө баран иһэригэр түбэһэбит. Хивус суолунан айанныыллар эбит. Онон халыҥыы илик мууһунан сэрэхтээхтик  айанныылларын сэргэ дьону таһар суудуналарга мэһэйи үөскэтэллэр. 

Холбоһуктаах рейдэҕэ полиция, ГИМС, МЧС, тырааныспар полицията уонна Дьокуускай куорат ыксаллаах быһыы - майгы хамыыһыйата кыттар. Иниспиэктэрдэр бары массыыналары тохтотоору кэтээн тураллар. Онуоха нүөмэрдэрин устан баран ааһа тураллар. Сорохтор хаарынан сыбаабыттарын биэлиэтии көрөбүт.  Ол эрэн туһааннаах устуулары иниспиэктэрдэр оҥордулар. Буруйдаахтары быһаарыыга үлэ саҕаланыа.

Роман Якушев, ЫБММ Саха сиринээҕи салалтатын дьоҕус суудуналарга иниспиэксийэтин Дьокуускайдааҕы салаатын судаарыстыбаннай иниспиэктэрэ: «Мы остановить их не можем. Мы можем провести профилактическую беседу. Они сами осознают, надевают капюшоны, прячутся, но они сами же рискуют».

Уоран туоруур массыыналар элбээбиттэринэн сибээстээн аны кэлэр рейдэлэр ГАИ кыттыгастаах барыахтара. Билигин муус халыҥыы илик. Сорох сиринэн олох да сиикэй сытар. Айанныы сылдьан хас да тааҥныыбыт сиргэ түбэстибит. Онон маннык хабааннаах рейдэлэр күннэтэ оҥоһуллуохтара. Тоҕо диэтэр Илин эҥээр туоруур муус суола арыллыа өссө да ыраах, халлаан туран биэрдэҕинэ аны кэлэр ый саҥатыгар көҥүллэниэ.

Виктор Кириллин, Дьокуускай куорат административнай хамыыһыйатын сүрүннүүр исписэлииһэ: «Өлүөнэ өрүспүтүгэр тахсан профилактическай беседалары ыыта сылдьабыт. Саха сирин олохтоохторугар мууска тахсар көҥүлэммэтин туһунан. Билигин мууска тахсыбыттар административнай эппиэтинэскэ көрүллэҕит. Чааһынай дьоҥҥор 3-5 тыһ. ыстыраап, урбаанньыттарга 20-50 тыһ. дылы. Тэрилтэлэргэ 100 тыһ. 1 мөл. дылы хааччахтаах».

Маннык хабааннаах рейдэлэр өрөспүүбүлүкэҕэ барытыгар өссө күүһүрүөхтэрэ. Халыҥыы илик мууска массыынанан айанныыр, сатыы сылдьар бобуулааҕын, киһи олоҕор кутталлааҕын өссө төгүл санаталлар.